Елімізде Әз-Наурыз мерекесі 10 күн тойланады. Қонаевта да мейрамға орай бірнеше шаралар ұйымдастырылмақ. Салтанатты кештердің легі «Көрісу – наурыздың бастауы» тақырыбымен басталды.
Алдымен қалалық алаңға жиылған жұртшылық көрісу рәсімін тамашалап, сауық-сайран құрды. Өнерпаздар жырдан шашу шашып, бишілер бұрала би биледі.
Қазақы дәстүрдің иісі аңқыған шара сал-серілердің көшіне ұласты. Мәдениет саласының қызметкерлері «Шарапат» әлеуметтік көмек көрсету орталығына барып, қарттарды мерекемен құттықтады. Кейіннен олар ірі сауда орталықтарына, базарларға ат басын бұрып, халыққа мерекелік көңіл-күй сыйлады.
Ал ертең шаһардағы бірнеше мекеме мен ауылдық округтерде «Бауырсақ party» өтеді. Сондай-ақ мереке аясында 16 наурыз күні табиғатты аялап, оған қамқор болу мақсатында жалпықалалық сенбілік ұйымдастырылмақ.
Қонаев қалалық әкімдігінің баспасөз қызметі
