Алматы облысында жауын-шашынның көп түсуінен 35 үйдің ауласына су кірді. Бұл туралы облыс әкімінің орынбасары Нұржан Құдайбергенов Орталық коммуникациялар қызметінде өткен брифингте мәлімдеді.
«Алматы облысында су тасқыны жағдайы тұрақты, елді мекендер мен жолдарды және басқа нысандарды су басу жағдайы болған жоқ. Өзен арналары тұрақты режимде жүріп жатыр. Жауын-шашынның көптігіне байланысты Алматы облысында жалпы көктемгі су тасу кезінде тек қана 35 үйдің ауласына су кірді. Бірақ жұмыстар дер кезінде жүргізіліп, суды тұрғын үйлер ауласынан шығардық», – деді Нұржан Құдайбергенов баспасөз мәслихатында.
Жалпы, Алматы облысында 310 гидротехникалық құрылыс, атап айтқанда, «Қапшағай», «Күрті», «Бартоғай» және «Бестөбе» сияқты су қоймалары бар. Бүгінде су толтыру режимдері штатты түрде жүргізілуде. Толтыру көрсеткіштері 44 пайыздан 99 пайызға дейін жетеді. Барлығы бақылауда.
«2024 жылғы су тасқыны кезеңіне дайындық мәселесі өткен жылғы комиссия отырысында талқыланған болатын. Жұмыстар дер кезінде атқарылып, биыл су тасқыны кезеңінде ешқандай оқыс оқиға болған жоқ. Тек қана Алматы облысы бойынша Іле ауданында Ворошилов су қоймасының бөгеті бұзылды. Жедел облыстық штаб жиналысы өтіп, қауіптің алдын алып, су қоймасы маңындағы ауылдардан су шығару жұмыстары толығымен атқарылды. Әскери бөлімдер, ауыл тұрғындары және еріктілер уақытылы жұмыс істеп, жағалауды бекітуінің арқасында бірде-бір үйге су кірген жоқ», – деді Нұржан Құдайбергенов.
Спикердің айтуынша, жыл басынан көктемге дейін елді мекендерден 3,7 мың текше метр қар шығарылды. Одан бөлек, автожолдар астындағы 157 су өткізу құбыры, темір жолдар астындағы 7 құбыр, 347 шақырым арық желісі, 156,9 шақырым арна және 82,1 шақырым су бұру каналдары тазартылған.
«Биылғы жылға облыс әкімдігінің резервінде 2 млрд 16 млн теңге қарастырылған. Аумақтық ТЖ департаментіне алдын алу жұмыстарын жүргізу үшін 110,6 млн теңге бөлінген. Су тасқыны күшейген жағдайда 1326 адам, 471 техника, 126 мотопомпа, 29 жүзу құралдары, 35 460 қапшық қарастырылған облыстың азаматтық қорғау қызметтерінің күштері мен құралдар топтамасы дайын. Сонымен қатар, облыста су тасқынынан зардап шеккен өңірлерге гуманитарлық көмек көрсету үшін «Күшіміз – бірлікте» еріктілер штабы құрылды. Бүгінде Батыс Қазақстан облысына 130 тонна гумманитарлық көмек жинақталып, жөнелтілді. Көмектің басым бөлігі – күнделікті тұрмысқа қажетті заттар мен азық-түлік, киім-кешек, төсек-орын жабдықтары, сондай-ақ тұрмыстық техника», – деді әкім орынбасары.
