Талғар қаласында Ауған соғысының ардагері, Талғар ауданының Құрметті азаматы, аудандық мәслихат депутаты болған Ерғалым Ждановты және сол соғыста ерлікпен қаза тапқан боздақтарды еске алуға арналған бокстан 2011 жылдары туған кіші жасөспірімдер арасында республикалық турнир өтті.
Болашақ былғары қолғап шеберлерінің жарысына Алматы қаласы, Маңғыстау, Қызылорда, Жетісу, Алматы облысы және оның барлық аудандарынан бір-бір командадан, сондай-ақ спорт мектептерінің атынан «Жігер» және «Жекпе-жек» жеке команда болып қатысты. Жас спортшылар 16 салмақ дәрежесі бойынша сынға түсті.
Асқар Алатаудың баурайында, табиғаты тамаша жерде орналасқан №2 Балалар мен жасөспірімдер мектебінде үш күн жалғасқан турнирдің қорытындысында Талғар ауданының спортшылары 4 алтын, 3 күміс медаль жеңіп алып, командалық есепте бірінші орын алды. Екінші орынды 4 алтын медальға қол жеткізген Еңбекшіқазақ ауданының спортшылары иеленсе, үшінші орынға 3 алтын, 2 күміс, 3 қола медальді қоржындарына салған «Жекпе-жек» командасының намысын қорғаған кіші жасөспірімдер жайғасты.
Төрешілердің шешімен Ильхам Иманжанов «Үздік боксшы» атанса, Алихан Бекбосын – «Жігерлілігі үшін», Құралбай Димаш – «Үздік техникасы үшін», Тұрсынбек Бағдәулет – «Көрермен көзайымы», ал Бекарыс Сержантұлы – «Олимп үміті» аталымдарына лайық деп танылды.
Барлық жеңімпаздар мен жүлдегерлер тиісті медальдар мен қоса диплом және кубоктармен марапатталды. Оларды Талғар қаласындағы Ауған соғысы ардагерлерінің «Жауынгер» қоғамдық бірлестігінің мүшелері табыстады.
– Ауған соғысына қатысып, интернационалдық міндеттерін өтеу кезінде мерт болған боздақтарды еске алу және жас ұрпақтың бойында оларға деген құрмет пен отаншылдық сезімдерін нығайту, жарысқа қатысу тәжірибесін қалыптастыру мақсатында Алматы облысының дене шынықтыру және спорт басқармасы, облыстық спортты дамыту орталығы мен бокс федерациясы ұйымдастырған бұл турнирге Талғар қаласындағы Ауған соғысы ардагерлерінің «Жауынгер» қоғамдық бірлестігінің мүшелері белсенді қатысып, үлкен қолдау көрсеткенін атап өткен жөн. Жарыс өте тартысты және мейлінше әділ өтті, – деді Алматы облысының кіші жасөспірімдер арасындағы құрама командасының аға бапкері, «Қазақ бокс әліппесі» кітабының авторы Әли Қамбаров.
Құтмағамбет Қонысбай,
Талғар ауданы
