Салауатты өмір салтын қалыптастыруда және тарихқа, салт-дәстүрге деген құрметті арттырып, халықтың патриоттық рухын асқақтата түсетін ұлттық спорт түрлерінің алар орны ерекше. Соңғы кездері облыста көкпар, аударыспақ, бәйге, жамбы ату, теңге ілу, асық ату, қазақ күресі, жекпе-жек, тоғызқұмалақ, дәстүрлі садақ ату, құсбегілік сынды ойындар қарқынды дамып, түрлі жарыстар өткізілуде. Жақында Ұйғыр ауданы Шонжы ауылында ұлттық ат спорты түрлерінен облыстық біріншілік өтті.
Аударыспақ, теңге ілу, жамбы атудан сайысқа түскен 2004-2006 жылы туған жастар арасындағы жарыс қорытындысында жамбы атудан «Түрік стилі» бойынша Жарылқасын Бекарыс, «Корей стилінде» Шарынбай Мадияр, «Қазақ стилінде» Қазбек Асылбек жеңімпаз атанды. Жамбы ату стилінде жалпы командалық есепте бірінші орынды Қарасай ауданы, екінші орынды Қонаев қаласы, үшінші орынды Еңбекшіқазақ ауданы еншіледі.
Аударыспақтан бақ сынағандар арасында 55 келі салмақ дәрежесінде Руслан Төкенұлы (Райымбек ауданы), 57 келі салмақ дәрежесінде Дәулетхан Мұхамет ( Кеген ауданы), 62 келі салмақ дәрежесінде Тоқтарғазы Құрмет (Райымбек ауданы), 68 келі салмақ дәрежесінде Сәрсенбай Сұлтанбек (Райымбек ауданы), 74 келі салмақ дәрежесінде Алмас Төкенұлы (Райымбек ауданы), 82 келі салмақ дәрежесінде Әділ Нұрислам (Қонаев қаласы), 87 келі салмақ дәрежесінде Абайбек Жансерік (Райымбек ауданы), 95 келі салмақ дәрежесінде Әбетай Сұңғат (Райымбек ауданы), 95 + келі салмақ дәрежесінде Бейбарыс Өркенұлы (Ұйғыр ауданы) жеңіс тұғырының ең биік сатысынан көрінді.
Теңге ілуден «Қос құлаш стилінде» Нұрболат Наран, «Бес белес стилінде» Нұрәлі Ерсін, «Жеті құт стилінде» Серікжан Байдаулет топ жарды.
Көкпардан ересектер бойынша Жамбыл ауданы бірінші орынды олжаласа, Кеген ауданы екінші, Райымбек ауданы үшінші орынға ие болды. Абай Мағжан (Райымбек ауданы) «Ең үздік салымшы», Ноғайбек Дулат (Жамбыл ауданы) «Ең үздік қорғаушы», Серікжан Бағдаулет (Кеген ауданы) «Ең үздік ойыншы» номинациясын иеленді.
Жарыстың жалпыкомандалық есебі бойынша Райымбек ауданы бірінші орынды жеңіп алды. Екінші орынды Кеген ауданы еншілесе, үздік үштікті Қонаев қаласы түйіндеді. Жеңімпаздар мен жүлдегерлерге медальдар, грамоталар мен ақшалай сертификаттар табысталды.
Айжарық Көптілеуов,
Ұйғыр ауданы
