Ұлы Отан соғысына Жамбыл ауданынан 5804 адам аттанып, оның 2330-ы ғана елге аман қайтқан екен. Ал 2711 боздақ майдан даласында қаза тауып, тағы 700-ден астамы хабар-ошарсыз кеткен. Сол қанқұйлы соғысқа қатысқандардан бұл ауданда бүгінде арамызда бір ғана майдангер қалды. Ол – Ұзынағаш ауылының тұрғыны Федор Ковалев.
Федор Ковалев әскерге 17 жасында алыныпты. Ол 1927 жылдың 11 қарашасында Белоруссияның Могилев облысы Климлев ауданы Орловка селосында дүниеге келген. 1941 жылы Орлов бастауыш мектебін бітіріп, 1942 жылы «Красный Белорусь» колхозында әр түрлі жұмысшы болып еңбек етеді. 1944 жылдың қазанында әскерге алынып, No34070 әскери бөлімінде екі айлық дайындық курсынан өтеді. 1945 жылдың мамырында фашистік Германия тізе бүккенімен, жаһандық соғыс әлі аяқталмаған еді.
Федор Мельянович тамыз айында кеңес-жапон соғысына қатысады. Жапондармен соғыста взвод командирінің көмекшісі бола жүріп, Отан үшін жан аямай соғысады. Әркез шабуылға шығар алдында жауынгерлерге рух беріп, жігерлендіріп отырады. Командирдің оң қолы екенмін деп өзін жауынгерлерден артық санамапты, ұрысқа бірінші болып алдымен ұмтылыпты. Сондай кездері қайсар Федор бомбалаудың астында бірнеше мәрте қалып қояды. Алайда көрер жарығы, татар дәмі алда әлі көп екен, қара жердің түте-түтесін шығаратын бомбалаудан жеңіл жарақатпен аман-сау шығып жүреді. Майдандағы ержүректігі үшін кеудесіне орден-медаль тағылады.
Соғыс аяқталғанымен, оны әскерден бірден босата қоймапты. Туған селосы Орловкаға әскерден 1951 жылдың маусым айында ғана оралады. Соғыс өрті шалған деревнясын қалпына келтіруге бел шешіп кіріседі. 1951-1952 жылдары Кузнецев ауданындағы Прокофьев училищесінде комбайншы курсын оқып бітіріп, ауыл шаруашылығын дамытуға үлес қосады. Таңның атысы, күннің батысы трактордан түспей егістік басында еселей еңбек етеді.
Қонақжай қазақ елінің Жетісу өңіріндегі Ұзынағаш ауылына 1969 жылы көшіп келеді. Содан бастап зейнетке шыққанға дейін ұзақ жыл аудандық техника жөндеу стансасында слесарь-электрмен дәнекерлеуші болып еселі еңбек етеді. Өз ісін жетік меңгерген шебер маман ауыл шаруашылығы техникаларын жөндеу жұмысындағы жоғары жетістіктері үшін атақ-абырой мен сый-құрметке бөленеді. Үнемі Құрмет грамоталарын алып, бағалы сыйлықтармен марапатталып жүреді. Ауыл шаруашылығы
текникаларының білгірі белгісін иеленіп, 1973 жылы социалистік жарыс жеңімпазы атанады.
Жұмыстағы әріптестері оны Федя ағай деп атапты. Көршілер арасында сыйлы, көмек сұрап келген барлық адамға қолынан келген жәрдемін аямапты. 1987 жылы зейнетке шыққаннан кейін де қол қусырып қарап отырмай, балаларына барынша көмектескен. Үш бала тәрбиелеп өсіріп, бүгінде олардан ондаған немере-шөбере сүйіп отыр. Федор Ковалев ІІ-дәрежелі «Ұлы Отан соғысы» орденімен, «Жуков» медалімен, Жеңістің 20, 40, 55, 70, 75 жылдығы мерейтойлық медальдарымен, «Еңбек ардагері» медалімен марапатталған. Жамбыл ауданының Құрметті азаматы.
Серік Сатыбалдиев,
Жамбыл ауданы
