Бүгінде Президент Қасым-Жомарт Тоқаевтың бастамасымен елдің түкпір-түкпірінде ұйымдастырылып жатқан «Таза Қазақстан» республикалық экологиялық акциясы Еңбекшіқазақ ауданында жалпыхалықтық сипатқа ие болды.
Науқанның басты мақсаты – тұрғындар арасында экологиялық мәдениетті қалыптастыру, қоршаған ортаға жанашырлықпен қарап, туған жердің тазалығына ден қою, келер ұрпақтың бойында патриотизм сезімін ояту екенін терең түсінген халық бұл іске жұмыла кірісті. Тазалық жұмыстары аудандағы 79 елдімекенді түгел қамтыды.
Науқан басталғалы небәрі 3 аптада аудан аумағынан 1734 тонна тұрмыстық қалдық шығарылды. Әлеуметтік нысандар – мектеп пен балабақша, Мәдениет үйлері мен кітапхана, аурухана, спорт алаңдары, ескерткіштер маңы мен саябақтарға, көше бойларына ұзын саны 10 мың түп ағаш пен гүл көшеттері отырғызылды. Тарихи-мәдени ескерткіштерді қайта қалпына келтіру жұмыстары жүргізіліп, айналасы абаттандырылды.
Мұндай сенбіліктің бірі – Қазақстан тәуелсіздігінің символына айналған Алтын Адам ескерткіші маңындағы тазалық акциясына аудан әкімі бастаған аудан белсенділері, ақсақалдар мен жастар қатысты. Түрген шатқалына барар жолда орналасқан бұл аумақ қоқыстан тазартылды. Туристерге арналған шатырлар мен орындықтар сырланды. Сонымен қатар «Атаңнан мал қалғанша, тал қалсын» демекші, жаздыгүні халық демалатын сүйікті орынға айналған бұл жерге 250 түп ағаш отырғызылып, жасыл желектің жайқалып өсуіне жағдай жасалды. Аудан әкімі Талғат Байеділов тұрғындарды табиғатты аялауға шақырып, қоршаған ортаның жай-күйі, туған топырағымыздың тазалығы – әрқайсымыздың іс-әрекетімізге байланысты екенін айтты.
Тазалық жұмыстары алдағы уақытта да жалғасын тауып, күнделікті әдетімізге айналса, құба-құп, әрине.
Құралай Мұратқызы,
Еңбекшіқазақ ауданы
