16-22 маусым аралығында Әли полигонында халықаралық әскери-патриоттық «Айбын – 2024» жастар жиыны өтеді. Оған Тәжікстан, Өзбекстан, Қырғызстан, Ресей және Қазақстаннан жас сарбаздар қатысып, әскери шеберліктерін сынға салады.
Биыл оныншы рет өтетін сайысқа елдегі әскери мектептер мен әскери бөлімшелер жанындағы жастар клубының, орта мектептердің әскери-патриоттық үйірмелерінің жас сарбаздары жиналады. Жаттығу алаңында пневматикалық винтовкадан оқ ату, автоматты бөлшектеп жинау, газ тұмылдырығы және жалпы әскери қорғаныс жиынтықтарын кию, қашықтыққа жүгіру кезінде жас патриоттардан нақты, дәл әрі анық орындалған әрекеттер талап етіледі. Шараның мақсаты – жастарды отансүйгіштікке тәрбиелеу, елін, жерін қорғай білуге баулу.
Сайыста Алатау қаласының №3 орта мектебінің 9-10 сыныптар арасынан іріктеліп алынған жас сарбаздар бақ сынамақ. «Бізге бұл ұсыныс айтылғанда ерекше қуандық. Себебі, балалар үшін бұл өте қызықты сайыс, әрі зор мүмкіндік. Жарысқа қатысушы оқушылардың бойынан патриоттық сезімді, жеңіске деген құштарлықты байқадым. Бүгінде жас сарбаздар жарысқа қызу дайындалуда. Ауданымыздың намысын қорғап жүлделі орынмен оралады деп сенемін», – деді өз сөзінде мектеп директоры Дина Күшекбаева.
Аталмыш мектепте алғашқы әскери және технологиялық дайындық пәнінің мұғалімі болып қызмет ететін Қайрат Әуелбеков: «Мектебіміз 53975 әскери бөлімімен келісімшартқа отырған. Соның негізінде біздің мектептің оқушылары «Айбын – 2024» әскери-патриоттық жиынына әскери-әуе күштері бөлімінің атынан қатыспақшы. Бүгінде әскери бөлім бізге қолдау мен көмек көрсетіп, қару-жарақ, киім-кешекпен қамтамасыз етіп отыр. Сол үшін де алғысымыз шексіз. Дайындық ойдағыдай жүріп жатыр. Оқушылар мектепте және әскери бөлімде турникке тартылудан, қашықтыққа жүгіруден, кросс, пресс, автоматты бөлшектеп жинаудан жаттығуда. Біздің мақсат – әскери бөлім мен ауданымызды ұятқа қалдырмай, жүлделі орынға ие болу», – деді.
Ал команда капитаны, №3 орта мектебінің 10-сынып оқушысы Бақыт Темірлан: «Командада 17 бала бар. Мектеп ішінде арнайы жарыс ұйымдастырылып, ең мықтылары іріктеліп алынды. Алғашқы әскери дайындықтан жоғары нәтиже көрсетуімнің арқасында команда капитаны болып сайландым. Күнделікті дайындығымыз қызық әрі нәтижелі өтуде. Әскери бөлім қызметкерлері жаттықтырып жатыр. Мектеп тарапынан да қолдауды сезінудеміз».
Ұлы дала ұландары алдағы жиында әскери қолбасшылармен кездесіп, винтовкадан оқ атып, граната лақтырып, қару-жарақ жинап жарысады. Іле ауданының намысын қорғайтын жас сарбаздарға біз де сәттілік тілейміз!
Бағдат Шойбас,
Іле ауданы
