Журналист болу – бала кезден бергі арманым. Осы жолда алдыма мақсат қойып, бүгінде Әл-Фараби атындағы Қазақ Ұлттық университетінің журналистика факультетінде білім алып жатырмын.
ҚазҰУ – менің журналистикаға қадам басуыма жол ашты. Бірінші курс оқып жүрген кезімде университет пен «Шалқар» радиосының бірлескен «Сұңқар» жастар бағдарламасының кастингіне қатысып, тәжірибе жинақтауға мүмкіндік алдым. Ойлаңызшы, өзім енді ғана оқуға түстім және бірден «Шалқар» радиосында эфир жүргіздім. Шыны керек, мұның барлығы журналистиканың қарашаңырағы ҚазҰУ-дың арқасында деп білемін. Біз қазірден университет қабырғасында жүріп, әртүрлі тақырыпта сюжет, материалдар дайындаймыз. Мәселен, осындағы «Фараби медиа» ютуб арнасында «ҚазҰУ-ға саяхат» атты жобам мен «Студент life» атты авторлық бағдарламамды жүзеге асырудамын.
Қаншама журналисті түлетіп ұшырған қара шаңырақта мамандықтың қыр-сырын меңгеруіміз үшін барлық жағдай жасалған. Мұнда студенттің тек теория жағынан ғана емес, тәжірибе тұрғысынан да шыңдалуына мүмкіндік ашылған. Қазір мен «Қазақстан» телерадиокорпорациясының Алматы қаласындағы филиалында өндірістік тәжірибеден өтіп жүрмін. Ол жерде «Таңшолпан» таңғы сазды бағдарламасы, «Қазспорт» телеарнасының спорттық хабарлары және Abai TV-ның мәдени-рухани бағдарламалары мен қаладағы әртүрлі концерттер түсіріледі. Практика барысында ақыл-ойдың айнасына айналған Abai TV телеарнасының ішкі жағдайымен таныстым. «Ұмытпаймыз», Сарасөз», «Үркер» бағдарламаларының түсірілімдерінде болып, ассистент ретінде көмектестім. Алматы қаласында орналасқан филиалда барлық бағдарлама 5-студияда түсіріледі. Түсірілім барысын арнайы режиссер, продюсер, редактор, дыбыс режиссері жоғарыда пульттен бақылап отырады. Ал студияда операторлар бағдарламаны режиссердің бағыт-бағдар беруімен түсіреді. Жұмыс процесі мен үшін қызықты болды. Бір бағдарламаны жарыққа шығару үшін қаншама адам еңбек етеді. Бұл тұста ұжымның бірлігі мен қажырлы еңбегін айтпаса болмайды. Сонымен қатар, Abai TV-да «Мәдениет жаңалықтары» хабары бар. Дәл осы хабарда жүріп, әртүрлі түсірілімдерге қатысып, мол тәжірибе жинақтадым. Республикалық деңгейдегі мәдени шара, кітаптың тұсаукесері, әртүрлі концерт, кездесулерге куә болдым. Одан бөлек, өндірістік тәжірибе кезінде монтаж процесімен де таныстым. Монтаж барысында эфирге арналған уақытқа қарай бағдарламаның көлемін қысқартамыз. Себебі телеарнадағы әр эфирдің уақыты шектеулі.
Жалпы маған телеарна жұмысы қатты ұнайды. Мұндағы әр күнің қайталанбайды. Себебі күнде жаңа ақпарат, әртүрлі түсірілімдер. Мені медиа әлемі қатты қызықтыра түсті. Алдағы уақытта өндірістік тәжірибемді «Қазақстан» телерадиокорпорациясының Алматы қаласындағы филиалында жалғастырсам деген ойдамын. Бұл жер менің журналистикада шыңдалуыма мүмкіндік берген мықты мектеп болды. Журналистика – бұл менің таңдауым. Болашақта Бейсен Құранбек сияқты халық қамын ойлайтын журналист болуды мақсат етемін.
Айгерім Есімхан,
Әл-Фараби атындағы Қазақ ұлттық университетінің 2-курс студенті
