Бұқаралық ақпарат құралдары қызметкерлері күніне орай Қазақстан Журналистер одағының шешімі бойынша, саналы ғұмырын журналистика саласына арнаған аға буын өкілі Дәулет Желдікбаевқа “Қазақстанның Құрметті журналисі” төсбелгісі берілді. Аталған марапатты Қазақстан Журналистер одағы Алматы облыстық филиалының төрағасы Гүлжан Қызайбай, “Өлке тынысы” ЖШС директоры Кәдірбек Құныпияұлы, облыстық “Алатау арайы” газетінің бас редакторы Қуаныш Тұнғатар қаламгерге табыстады.
Дәулет Желдікбаев 40 жылдан астам Нарынқол аудандық “Советтік шекара” газетінде жемісті еңбек етті. Жауапты хатшы, редактордың орынбасары және бас редактор қызметтерін абыроймен атқарды. Әлнұр Мейірбеков секілді көсемсөз шебері атанған ардагерлердің сенімін ақтап, Мұқағали Мақатаев жұмыс істеген аудандық газеттегі міндеттерді мінсіз орындады. Сағат Әшімбаев, Баққожа Мұқаилардың тырнақалды шығармаларын аудан оқырмандарымен қауыштырды. Атақты ақын Еркін Ібітановпен бір шаңырақта тізе қосып еңбек етті. Ардагер журналистен тәлім алған інілері баспасөздің марқасқаларына айналды.
Қазір жасы 86-ға келген қадірменді қария Талғар ауданына қарасты Тұздыбастау ауылында тұрады. Зайыбы Айман апа екеуі ұл-қыздарының, олардан өрбіген ұрпақтарының бақытына кенелуде. Бүгінгі ізбасарларының елеп-ескергеніне риза болған қария, әріптестеріне, ел-жұртына ақ батасын арнады.
