Талғар ауданы Панфилов ауылындағы «Қобыланды» ипподромында 9-11 маусым күндері ұлттық спорт – теңге ілуден алғашқы Азия чемпионаты өтті. Қыркүйек айында Астанада жалауын көтеретін 5-ші Дүниежүзілік көшпенділер ойындарына дайындық аясында ұйымдастырылған халықаралық жарыста Қазақстан, Өзбекстан, Қырғызстан, Венгрия, Тәжікстан, Түркіменстан, Моңғолия, Қытай, Ауғанстан, Ресейден келген спортшылар бақ сынады.
Дүбірлі доданы Алматы облыстық дене шынықтыру және спорт басқармасының басшысы Ерболат Сарабеков ашып, аттың құлағында ойнайтын шабандоздарға сәттілік тіледі.
– Бүгінгі күн өңіріміз үшін ерекше және тарихи сәт болып тұр. Бізді бір арнаға тоғыстырған ұлттық спорт түрі – теңге ілуден Азия чемпионатының салтанатты ашылуымен баршаңызды шын жүректен құттықтаймын!
Мемлекет басшысы Қасым-Жомарт Тоқаевтың тікелей қолдауымен елімізде ұлттық спорт түрлері қарқынды дамып келеді. Оның бір айқын дәлелі – биылғы жылдың ең дүбірлі додасының бірі, Астанада өтетін 5-ші Дүниежүзілік көшпенділер ойындары. Бұл еліміздің ұлттық идеологиясын, дәстүрін, тарихын әлемге паш ететін ауқымды іс-шара болмақ, – деді ол.
– Чемпионатта 10 елдің спортшылары теңге ілудің үш стилі: «Бес белес», «Қос құлаш» және «Жеті құт» бойынша сынға түсті. Азия чемпионатын өткізудегі мақсатымыз – ұлттық ойынымызды өзге елдерде танымал ету. Бүгінде Қырғызстан мен Моңғолияның спортшылары жақсы ойын өрнегін көрсетіп, біздің спортшыларымызға басты бәсекелес болды, – деді ат спорты түрлерінен мемлекеттік жаттықтырушы Нұркен Байбөриев.
Сонымен, теңге ілу спортынан өткен алғашқы Азия чемпионатында «Бес белес» стилі бойынша отандасамыз Ғалымжан Ізжанов жеңімпаз атанса, екінші орынды Монғолиядан келген спортшы Айболат Ұнатхан, ал үшінші орынды қырғызстандық Асхат Талайбеков иеленді.
«Қос құлаш» стилінде бас бәйгені Қазақстан спортшысы Рахат Қамбаров қанжығаға байласа, Қырғызстаннан келген Алый Назаровқа – екінші, өзбекстандық Азизбек Закиржановқа – үшінші бәйге бұйырды.
«Жеті құт» стилінде де тағы бір жерлесіміз Бақыт Төлтай үздік нәтиже көрсетсе, екінші орын – монғолиялық спортшы Серік Жеңісбекке, ал үшінші орын – Өзбекстаннан келген Қодиржон Егембердиевке бұйырды.
Азия чемпионатында қазақстандық команда абсолютті чемпион атанды. Ал Қазақстан ұлттық құрамасының мүшесі Рахат Қамбаров сайыстың үздік теңге ілушісі атағын иеленді.
Жарысты ҚР Туризм және спорт министрлігі, ҚР Ұлттық спорт қауымдастығы, Алматы облысы әкімдігі, ұлттық ат спорты орталығының қолдауымен республикалық теңге ілу федерациясы ұйымдастырды. Алғаш рет өткен Азия чемпионаты қарсаңында Теңге ілуден халықаралық федерация құрылғанын да айта кеткеніміз орынды болар. Оның негізін Қазақстан, Қытай, Моңғолия және Венгрия елдерінің ұлттық федерациялары құрады.
Құтмағамбет Қонысбай,
Талғар ауданы
