Еңбекшіқазақ ауданында шахматтан турнир өтті. Ақыл-ойды дамытатын интеллектуалдық ойын бұл жолы аудан ақсақалдарының басын қосты.
Есік қаласында Т.Молдағалиев атындағы мәдениет үйінде ұйымдастырылған турнирге ауылдық округтерден ардагерлер ұйымының, ақсақалдар кеңесінің төрағалары мен мүшелері – барлығы 26 ойыншы қатысты. Алматы облысы «Қоғамдық келісім және даму орталығы» ММ-нің Еңбекшіқазақ аудандық бөлім басшысы Олжас Сатай бұл сайысты ақсақалдардың басын қосып, қоғамдық өмірге белсенді араласуына, бұқаралық спортты дамытып, жастар тәрбиесіне көңіл бөлуге шақыру мақсатында өткізіп отырғандарын айтты.
Турнир соңында жеңімпаздар анықталып, аудан әкімі орынбасарының дипломымен марапатталды. І дәрежелі дипломды ойлау, жүйелеу және сараптау қабілетінің жоғары екенін көрсеткен тыл еңбеккері, 90 жастағы Сусол Сергей алды. Екінші дәрежелі дипломды Бурашев Шәріпбек иеленсе, ІІІ дәрежелі диплом Хауан Семсерханға бұйырды. «Патшалар ойыны» атанған шахматты ақсақалдар алдағы уақытта жиі ойнап тұратын болып тарқасты.
Құралай Мұратқызы
