Облыстық AMANAT партиясы жанындағы «Жер аманаты» жобасының аясында жиын өтті. Оған облыстық партия филиалының төрағасы Қуат Байғоджаев төрағалық етті.
Отырыстың күн тәртібінде пайдаланылмаған ауыл шаруашылығы мақсатындағы жекеменшікке берілген жерлер бойынша атқарылған іс-шаралар талқыланды. Жайылымдық жерлер мәселесі бойынша проблемалық ауылдарда атқарылып жатқан жұмыстар туралы сөз қозғалды.
Сондай-ақ, Жамбыл және Ұйғыр аудандарындағы пайдаланылмай жатқан ауыл шаруашылығы мақсатындағы жерлерді мемлекет меншігіне қайтару жұмыстары айтылды.
Облыстық жер ресурстарын басқару департаментінің басшысы Жандос Нұрлыбаевтың айтуынша, өңірде иесіз, игерусіз жатқан мыңдаған гектар жер учаскелері мемлекет меншігіне қайтарылып жатыр. Бұл өңірдегі жайылым тапшылығы мәселесін шешеді.
«Биыл жыл басынан бері 53 878 гектар пайдаланылмайтын ауыл шаруашылық мақсатындағы жерлер мемлекет меншігіне қайтарылды. Оның ішінде 52 мың гектар жайылым, 1 мың гектардан астам егістік, 690 гектар шабындық бар», – дейді Жандос Нұрлыбаев.
