Оқу жылы аяқталғанымен, үш айлық демалыста білім мекемелерінің есігі жабылмайды. Жамбыл ауданы Ынтымақ ауылындағы С.Оспанов атындағы орта мектебінде де жазғы сауықтыру лагері жұмыс істеуде.
«Болашақ» лагері белгіленген жоспарға сәйкес 9 маусым мен 19 шілде аралығында 1-ші кезең бойынша жұмысын жүргізуде. Тәрбиешілер мен ұстаздар онда келген әрбір оқушыны жақсылыққа, адамгершілікке, ұйымшылдыққа тәрбиелей отырып, демалысын тиімді пайдалана білуге үйретуді мақсат еткен.
– Мұнда балалардың жазғы демалысын неғұрлым қызықты әрі мағыналы өткізуге қажетті жағдайлар жасалған. Салауатты өмір салтын қалыптастыру, рухани және мәдени білімдерін жетілдіру, ұлттық салт-дәстүрді бойына сіңіру, отансүйгіштік сезімін арттыруға ықпал етеміз. Лагерьге балалардың уақытымен және толық қатысуы қадағаланып, әр күнді бағдарлама бойынша барынша ұйымдасқан түрде өткізуге баса назар аударылады, – дейді мектеп директоры Қарлығаш Алғожақызы.
Балалар ойын алаңында ертеңгілік дене жаттығуларын жасап, қимыл-қозғалыс ойындарына қатысады. Саяхат және жорық кезінде қауіпсіздік ережелерінің сақталуын бір сәтке назардан тыс қалдырмауға ерекше мән берілген. Далалық жағдайда бірыңғай тәртіпте салтанатты жиындар өткізілді. Шығармашылық қабілеттерін арттыру мақсатында сурет, қолөнер байқаулары мен көрме ұйымдастырылды. Ұлттық, логикалық және спорттық ойындарға балалар қызыға қатысады.
Бұл кезеңде алдымен «Демаламыз, күлеміз. Көңілді жазды сүйеміз» атты танысу мерекесі өтті. «Сен дәстүрді білесің бе?» викториналық сұрақтар байқауы, «Отанымның тарихы – менің тарихым» зияткерлік сайысы, шар ойыны сияқты шараларға қатысты. «Менің болашақ мамандығым» психологиялық сағатында пікір алмасып, «Болашақта кім болғым келеді?» деген тақырыпта сурет салды. Бала тәрбиесі туралы киноны тамашалап, соңынан оны өзара талқылады. Сондай-ақ дене және ой жылдамдығын анықтайтын сұрақ-жауап және спорттық жарыстар өте қызықты өтті.
Мектеп жанындағы жазғы демалыс және сауықтыру лагері үш кезеңмен жұмыс істейді. Алдағы екі кезең де мәнді, мағыналы өткізілмек.
Серік Сатыбалдиев,
Ынтымақ ауылы,
Жамбыл ауданы
