Алматы облысының Төтенше жағдайлар департаменті басқа да тиісті органдармен бірлесіп, өңіріміздің су айдындарында, әсіресе ауылдық жерлерде қайғылы оқиғалардың алдын алу үшін 2 мыңнан астам рейд өткізді.
Алдын алу жұмыстары барысында жадынамалар , ақпараттық парақтар таратылды. Су айдындарында балалардың қауіпсіздігін қамтамасыз етуді мақсат тұтқан кешенді шара жалпы саны 18 мыңнан астам адамды қамтыды. Осыған орай, департамент қызметкерлерінің қатысуымен облыстың стационарлық бассейндерінде 2500 балаға жүзуге үйретілді.
«Осы жылы қабылданған шаралар өз нәтижесін беруде. Өткен жылмен салыстырғанда қапияда қаза тапқан бала саны азайды. Биыл балалардың суға кету оқиғасы тіркелген жоқ», – деді Алматы облысы ТЖД АҚБ басшысы подполковник Ералы Разақұлов.
Айта кетейік, шомылу маусымы басталғаннан бері Алматы облысында 14 адам, оның ішінде екі бала құтқарылды. Спикердің айтуынша, балалар тап болатын жазатайым оқиғалар балаларды қараусыз қалдырғаннан туындап жатады.
«Жазғы уақытта біз ересектерді, ата-аналарды, балалардың судағы қауіпсіздігіне көбірек көңіл бөлуге шақырамыз, балалармен демалуға тек шомылуға барлық жағдай жасалған, рұқсат етілген жағажайларға ғана баруға кеңес береміз», – деді спикер.
