Алматы облысының әкімі Марат Сұлтанғазиев Heritage Investment Holding компаниясының өкілдерін қабылдады. Кездесуде құрылыс саласын қарқынды жүргізіп, қонақ үй салумен айналысатын кәсіпорынның инвестициялық жобасы талқыланды.
Қонаев қаласында 5 жұлдызды қонақ үй салуға ұсыныс білдіріп отырған компанияның президенті Rakeshkumar Rajdev – Үндістанның Гуджарат штатындағы Раджкотта қаласында туған белгілі кәсіпкер. Оның Үндістанның Дваркада қаласында «Roma Kristo» атты 3 жұлдызды қонақ үйі бар. Ал биыл Грузияның Батуми қаласында 5 жұлдызды «Courtyard by Marriott» қонақ үйін ашты. Кәсіпкердің бұдан басқа Дубайда 3 компаниясы бар.
Кездесу барасында алғашқы болып сөз алған Марат Елеусізұлы қонақтарға құрмет көрсетіп, Алматы облысына келген сапарларына сәттілік тіледі. Сонымен қатар өңір экономикасының серпінді тұстарын тілге тиек етіп, облыс орталығы Қонаев қаласының даму жолына тоқталып өтті. Келесі кезекте ірі компанияның сәулетшілері Christian Semaan мен Nare Salorian инвестициялық жоба жайын әңгімелеп, облыс орталығында бой көтеретін қонақ үй мен ойынхананың көрсетілімін таныстырды. Облыс әкімі Қонаев қаласының көркін ашып, өңірдің өркендеуіне үлес қосатын жобаға жоғары баға беріп, қолдайтынын жеткізді. Сондай-ақ инвестициялық жобаны жүзеге асыруда қажетті көмектің барлығы көрсетілетінін алға тартты. Артынша сөз алған компанияның атқарушы директоры Ashot Tumanian өңір басшысынан құжат дайындау кезеңдерінен бастап құрылыс жұмыстары қарқын алғанда электр энергиясымен қамтып, газдандыруға көмектесіп, көгалдандыру шараларына қолдау танытуын сұрады. Осы орайдағы барлық қызмет жергілікті атқарушы органдар тарапынан көрсетілетінін жеткізген Марат Елеусізұлы ең бастысы дәл көрсетілімдегідей сапалы да сәнді, қала ажарын айшықтайтын ғимараттың сап түзеуін сұрады. Жоспардағыдан да жарқын қонақ үй болатынына уәде берген компания өкілдері сенім танытқан облыс әкіміне зор алғысын жеткізді. Бес жұлдызды қонақ үй тек қалталы азаматтардың ғана емес, қала тұрғындарының да демалыс орнына айналмақ. Бұл қонақ үйде балалардың ойын алаңдары мен үлкендер сергіп қайтатын спа салондар, кәсіпорынның әлем бойынша әйгіленген хош иісті тағамдары бар асханалар қызмет көрсетпек.
Алдағы уақытта құжаты дайындалып, басқа да мәселелері шешілсе, қонақ үйдің құрылыс жұмысы келер жылдың басында басталмақ.
Құралбек Сәбитов,
Қонаев қаласы
