Еңбекшіқазақ ауданы Қайназар ауылында тұратын Исраилов Рамильдің шаңырағында үлкен қуаныш. 29 жастағы Рамина Рехимжанқызы үшем босанып, көп балалы ана атанды.
17 маусымда Алматы қаласындағы «Акушерия, гинекология және перинатология ғылыми орталығында» дүние есігін ашқан сәбилер денсаулық жағдайы нашар болғандықтан орталықта жан сақтау бөлімінде он бір күн жатқан. Ал одан кейін Педиатрия және балалар хирургиясы ғылыми орталығында 20 күндей емделіп, кеше ғана сәбилер үйіне оралды. Оларды туыс-туғанымен бірге округ әкімі, ауыл ақсақалдары мен депутаттар да құттықтап барды.
Үшем кесар тілігімен уақытынан бұрын дүниеге келді. Ең үлкенінің бойы – 46 см, салмағы – 2280 гр болса, ең кішісінің бойы – 42 см, салмағы – 1450 гр. Үшеуі де – ұл бала. Әке-шешесі оларға Үміт, Омар, Билал деген есім беріпті. Бес жыл бұрын шаңырақ көтерген жас отбасының Радмир есімді 4 жастағы үлкен ұлы бар.
Ал мұның алдындағы үшем Еңбекшіқазақ ауданында 2013 жылы тіркелген және Есік қаласындағы перзентханада дүниеге келген. Үш қыздың әкесі де, шешесі де – ауданда медицина саласының қызметкерлері.
Жалпы, Еңбекшіқазақ ауданында Есік қаласы мен Шелек ауылындағы екі орталық ауруханада биылғы 6 ай ішінде барлығы 2130 бала туса, оның 14-і егіз екен.
Құралай Мұратқызы
