Қонаев қаласының Мәдениет үйінде Конституция күніне орай салтанатты шара өтті. Ең алдымен Көк Туымыз көкке көтеріліп, Мемлекеттік Гимн орындалды. Тұрғындарды айтулы мерекемен құттықтаған облыс әкімі Марат Сұлтанғазиев Ата Заңымыз елдігіміздің өзегі, берекеміздің бастауы екенін айтты.
– Осыдан 29 жыл бұрын жалпыхалықтық референдумда қабылданған Конституция еліміздің саяси, әлеуметтік-экономикалық дамуының негізгі қағидасы. Президентіміз Қасым-Жомарт Кемелұлы «Ата Заңымыз – мемлекетіміздің тұғыры берік болуын қамтамасыз ететін ең басты құжат. Оның әрбір тармағы мүлтіксіз орындалса ғана елдік пен заң үстемдігі орнайды», – деп оның маңыздылығын айшықтап көрсеткен болатын. Конституция – тәуелсіздігіміздің тірегі, кемел келешегіміздің кепілі екені айқын. Сондықтан оны ардақтау әрқайсымыздың парызымыз, – деді Марат Елеусізұлы.
Мереке аясында еліміздің дамуына елеулі үлес қосқан азаматтарға құрмет көрсетіліп, ерен еңбегі үшін марапатталды. Халықаралық ақпараттандыру академиясының академигі, республиканың Құрметті құрылысшысы Жандулла Әбдімұратов пен «Monterra Qasaqstan» ЖШС-ның бақылау кеңесінің мүшесі Рүстем Дәулетке «Парасат» ордені табысталды.
– Осындай айтулы күнде еңбегім еленіп, «Парасат» орденін алу – мен үшін үлкен мәртебе. 40 жылдан астам уақытымды құрылыс саласына арнадым. Еліміздің көркейіп, өркендеп дамуына үлес қоса алғаным үлкен бақыттымын. Осы жолда бірге жұмыс істеп, аянбай тер төккен барша жанға алғысымды білдіремін. Бұл тек маған ғана көрсетілген құрмет емес, жан-тәнімен қызмет еткен барша құрылысшыларға арналады. Берік Конституциямен іргесі бекітілген еліміз әрқашан ілгері жылжып, өркендей берсін, – деді «Жөндеу-Құрылыс» ЖШС директоры Жандулла Әбдімұратов.
Бұдан бөлек құрылыс саласындағы еңбек ардагері Ташполат Жамаловқа «Құрмет» ордені, «КиікбайСтрой сервис» ЖШС төрағасы Қияс Ақбергенге және «Риголит» ЖШС директоры Сайдолла Сәрсековке III дәрежелі «Еңбек даңқы» ордені табысталды. «Ерен еңбегі үшін» медалімен өңірдің жол құрылысы мен инфрақұрылымын дамытуға қосқан үлесі үшін «Балқаш жолдары» ЖШС директоры Асқар Ибраев, «ҒұнСтрой сервис» ЖШС директоры Сәбит Қалимолдаев және «Дәулет Серпін 603» ЖШС директоры Асылбек Омарханов марапатталды.
Еліміздің еңбек сіңірген қайраткері, Қазақ академиялық драма театрының актері Бекжан Тұрысқа, Еңбек ардагері Райхан Садықоваға, «Бірлік» кәсіподақ ұйымының төрағасы Сайран Смағұлов пен «Сәт» мешітінің имамы Сейітқали Ертаевқа «Алматы облысының Құрметті азаматы» атағы берілді.
Марапаттау рәсімінен кейін эстрада жұлдыздарының қатысуымен дәстүрлі және патриоттық әндер шырқалып, көрерменнің рухын оятып, керемет әсерге бөледі.
Гүлзат Байқонысова
