Алматы облыстық «Атамекен» кәсіпкерлер палатасында іскер әйелдер кеңесі өтті. Кеңеске облыстың белсенді азаматтары мен іскер әйелдер кеңесінің төрағасы Ләззат Ботабекова қатысты. Шара шеңберінде жарты жыл бойы аталған кеңес көмегімен атқарылған жұмыс қорытындыланып, сала бойынша баяндама жасалды.
Жиында айтылғандай, биыл қаңтар айынан бастап Алматы облысы бойынша 1500-ден астам қыз-келіншекке көмек көрсетілген. Баршаға белгілі, Іле ауданында әйелдерге арналған коворкинг орталығы ашылған болатын. «Атамекен» кәсіпкерлер палатасы әйелдерді қолдау мақсатында өз тарапынан құжаттарды реттеу, бизнес-кеңес, құқықтық қорғау, кәсіпкерлердің біліктілігі, кәсіпті дұрыс дамыту бағыттарында үнемі көмек көрсетіп келеді.
Есепті басқосуда кәсіпкерлер палатасы жанынан құрылған іскер әйелдер кеңесінің Қарасай аудандық бөлімінің төраға орынбасары Әсел Жылқыбаева атқарылған жұмыстар жөнінде есеп берді. Спикер өз сөзінде сала бойынша әйелдерге оқыту жұмысы жүргізілді және аудан прокуратурасымен бірлесіп, инвесторлармен кездесулер мен жеңілдетілген несиелеу бойынша жобалар жүзеге асырылып, 100-ге жуық түрлі бизнес-жоспар жасалғанын атап өтті. Алматы облысын қамтитын зейнеткерлерге арналған «Ұзақ өмір сүру» деп аталатын арнайы орталық ашылды. Сондай-ақ, «Атамекен» кәсіпкерлер палатасында іскер әйелдер кеңесі балабақша құрылтайшыларымен бірге биометриялық идентификациялау бойынша түсіндірме жұмыстарын да жүргізіп отырады. «Таза Қазақстан» акциясына да әйелдер кеңесі біршама үлесін қосты. Айта кетсек, тұрғындар арасында экологиялық мәдениетті қалыптастыру, отансүйгіштікті дәріптеу мен қоршаған ортаны аялау мақсатында кәсіпкерлермен бірлесе облыстың қоғамдық орындарында тазалық жұмысы, ағаш отырғызу, гүл егу сынды істер атқарылды.
Қазіргі кезде облыста 138 мыңнан астам кәсіпкер тіркелген. Соның 42 пайызы – әйелдер қауымы. Демек, әйелдер өнеркәсіпте, ауыл шаруашылығында, банк қызметтерінде, жеке кәсіпкерлікте әртүрлі маңызды қызметтер атқаруда. Облыстық «Атамекен» кәсіпкерлер палатасы директорының орынбасары Ержан Дүйсекенов: «Өңірдегі әйелдердің кәсіпкерлік ортадағы белсенділігін күшейту және экономикалық бастамаларын қолдау мақсатында іскер әйелдер кеңесі жұмыс атқарады. Олар көптеген істе белсенділік танытып, алдыңғы қатарда жүреді. Мәселен, алдағы уақытта іскер әйелдердің ұйымдастыруымен Қонаев қаласында «Бір ауыл – бір өнім» көрмесі өтеді», – деп жиынды қорытындылады.
Назерке Ермекқызы,
облыстық «Атамекен» кәсіпкерлер палатасының баспасөз хатшысы
