Кеген өңірінде биыл жаз жаңбырлы болды. Жердің ылғалдылығы шаруалардың мол өнім алуына мүмкіндік туғызды. Диқандар әр күнін зая жібермей, алқапта еңбек көрігін қыздырды. Төккен тер босқа кетпеді. Енді, міне, самал желмен теңіздей тербелген алтын дәнге орақ түсті.
Бізде қарап жатпай, Қарқара ауылдық округіндегі еңбекшілер дүбіріне атбасын тіредік. Аудандық ауылшаруашылық бөлімінің басшысы Жасұлан Әбдірасылұлын егіс алқабынан кездестіріп, сөзге тарттық. «Биыл Кеген ауданы бойынша 8100 гектарға дәнді дақыл себілді. Оның 1300 гектары – күздік бидай, 6800 гектары – жаздық арпа. Бүгінгі күнге дейін 5800 гектар арпа орылып, орташа түсім 15 центнерден айналуда», – дейді ауылшаруашылық маманы.
Жиын-терін қыркүйек айының соңына дейін аяқталады деп жоспарланып отыр. Жасұлан Әбдірасылұлынан қысқы мал азығы барысын сұрағанымызда: «Жоспар 187000 тонна еді. Бірақ біз 200000 тоннаға жеткізіп, артығымен орындадық», – деді.
Қарқара ауылының тұрғыны, «Ынтымақ-Б» шаруа қожалығының төрағасы Бақытжан Асқарбаевтың қожалығында 170 гектар егістік, 17 гектар суармалы жер мен 70 гектар шабындығы бар. Қыстың қыр астында екенін түсінген қожалық төрағасы техникаларын күні бұрын сайлап қойған. Тіркемелі екі «Камаз» қыстауға мал азығын тасып жатқанын көріп, өнім мол болсын деген тілегімізді жеткіздік.
Нұрболат ТАСТАНҚҰЛОВ
Кеген ауданы
