Жамбыл ауданының жасы үлкен азаматтары Қазақстанда атом электр стансасын салу-салмау мәселесіне байланысты референдумда белсенділік танытуда. Жасы 103-тегі Томухан Тұмарбаева өзі тіркелген дауыс беру орнына келіп, ел болашағына қатысты таңдауын жасады.
Томухан әже Ұзынағаш ауылы Көкбастау көшесінің тұрғыны. Ол Тұрар Рысқұлов атындағы орта мектепте орналасқан дауыс беру учаскесіне балалары, немере-шөберелерімен бірге келді. Сайлау заңнамасына сәйкес белгіленген тәртіппен комиссия мүшелерінен бюллетенін алып, ондағы сұраққа өз қолымен тиісті белгісін қойып, арнайы жәшікке салды. Апамыздың қоғамдық-саяси өмірдегі белсенділігіне куә болғандар сүйсіне ризашылықтарын білдіріп, мектеп ұжымы оған сый-құрмет жасады.
– Біз, комиссия мүшелері, сайлаушылар тізімін нақтылау кезінде апамыздың жас шамасына қарай үйден дауыс беретін шығар деп ойлаған едік. Сөйтсек, Томухан әже өзі барып таңдау жасайтынын айтыпты. Оған, әрине, риза болдық. Анау жылғы Президент сайлауында да апамыз осында өз аяғымен келген болатын, – дейді аталған білім шаңырағындағы №264 дауыс беру учаскесінің төрағасы Эльмира Мақашева.
Серік САТЫБАЛДИЕВ
Жамбыл ауданы
