12-13 қазан күндері Астана қаласында тұрғындар мен қонақтарға ауыл шаруашылығы өнімдерінің кең ауқымын ұсынатын ауқымды жәрмеңке өтеді.
Алматы облысы бұл шараға 189 тоннадан астам түрлі өнім әкеледі.
«Жәрмеңкеге Алматы облысынан 7,5 тонна құс еті, 1,6 тонна сүт өнімдері, 21,6 тонна картоп, 25 тонна пияз, 24,4 тонна көкөніс, 23 тонна алма, 23 тонна басқа да жеміс түрлері және 47,7 тонна басқа да өнімдер ұсынылады. Картоп, пияз, жаңа піскен жемістер мен көкөністердің барлығы қала базарларындағы бағадан 15 пайызға төмен бағада сатылады. Бұл – жергілікті тауар өндірушілерді қолдаудың тамаша мүмкіндігі», – дейді облыстық ауыл шаруашылығы басқармасының басшысы Қуандық Чункунов.
Жәрмеңкенің басты мақсаты – фермерлер мен өндірушілерді қолдау. Алматы облысынан келген қатысушыларға 20 орын қарастырылған, бұл оларға өнімдерін өткізу нарығын кеңейтуге мүмкіндік береді. Жәрмеңке тек сауда алаңы ғана емес, сонымен қатар фермерлер үшін тәжірибе алмасуға, жаңа серіктестер табуға және танысуға арналған таптырмас мүмкіндік.
Ауыл шаруашылығы жәрмеңкелері ауыл мен қала тұрғындарының байланысын нығайта отырып, қала өмірінің ажырамас бөлігіне айналуда. Олар жергілікті өндіріс пен табиғи өнімдердің маңыздылығын арттыруға септігін тигізеді. Астанада өтетін бұл жәрмеңке – жоғары сапалы өнімдерді баршаға қолжетімді ету жолындағы маңызды қадам.
Ауылшаруашылық жәрмеңкесі – жай ғана сауда емес, бұл табиғат пен қаланың кездесуі, еңбек пен дәстүрдің бағаланатын сәті.
