Қонаев қаласының әкімдігінде АЭС салуды қолдау жөніндегі облыстық халықтық штабтың қорытынды жиналысы өтті. Жалпыхалықтық референдумнан кейін бас қосқан халықтық штаб мүшелері облыс тұрғындарының өз таңдауын жасаудағы белсенділігін атап өтті.
Ең алдымен, «AMANAT» партиясы Алматы облыстық филиалының атқарушы хатшысы Ерлан Жақыпов референдум нәтижелерін таныстырып, АЭС салуды қолдау жөніндегі халықтық штаб жұмысының тиімділігін тілге тиек етті.
Оның айтуынша, штаб мүшелері облыс бойынша 500-ден астам іс-шара өткізіп, 80 мыңнан астам адамды қамтыған. БАҚ-та 830 мақала және әлеуметтік желіде 50 мыңға жуық жазба жарияланған. Ал белсенділер 100 мыңнан астам үгіт-насихат плакаттарын жапсырған. Тұрғындар белсенділігі жоғары болған.
– Бұл дауыс беру – Қазақстанның прогресс жолымен, халық үніне құлақ асатын мемлекет жолымен жүріп жатқанының айғағы. Мемлекет басшысының бастамасы ел пікіріне негізделгені өте маңызды. Бұл шешім еліміздің энергетикалық тәуелсіздігін нығайтып, экономикамыздың дамуына ықпал етері сөзсіз. Әрбір адам өз дауысының маңызды екенін сезінді. Бұл шынымен де ел тұрғындарының саяси санасы өсіп келе жатқанын аңғартады, – дейді халықтық штаб мүшесі Сұлтан Нұрдәулетов.
Айта кету керек, өңірде дауыс беруге қатысқан азаматтардың 72,5 пайызы атом электр стансасының құрылысын қолдады.
Өз тілшіміз
