Кеген ауданындағы Жалағаш Мәдениет үйінде аналар кеңесінің ұйымдастыруымен көп балалы ана, ақ жаулықты әже Биғайша Әліқұловамен кездесу кеші өтті. Аталған шараға Кеген аудандық ішкі саясат бөлімінің басшысы Еркінбек Қалқаев, аудандық аналар кеңесінің төрағасы Бақытгүл Демежанқызы, ауыл әкімі Айгүл Садырова мен жұртшылық өкілдері қатысты.
Биғайша Нұрзаққызы 1937 жылы 27 маусымда Қытай Халық Республикасының Тоғызтарау елдімекенінде дүниеге келген. Сауатын төте жазумен ашқан. 1955 жылы 25 ақпанда Әліқұл әулетіне келін болып түсіп, Жүнісбай атамен отау құрады. 1959 жылдың маусым айында атажұртқа оралған. Сол жылы тамыз айынан бастап Тоғызбұлақ ұжымшарында еңбек етті. Жылқы бағып, бие сауды, ұжымшар жұмысшыларына тамақ әзірледі. Сөйтіп жүріп отағасы екеуі 15 ұл мен қыз тәрбиелеп өсірді. «Батыр ана» атанды.
Қолынан өнері тамған анамыздың бал татыған қымызы, ірімшігі пен сары майы, кілегейі – дастарханның берекесі. Бие сауылып, желіден құлын байланып тұрған шаңырақтан қонақ үзілмеген. Өз қолымен алаша тоқып, түскиіз тіккен. Жасаған құрақ көрпелері ұзатылған қыз жасауының сәнін кіргізді. Бүгінде жасы 87-ке келген Биғайша апамыз 49 немере, 48 шөбере сүйіп отыр.
Кездесу кешін аудандық ішкі саясат бөлімінің басшысы Еркінбек Қалқаев ашты:
– Биғайша Нұрзаққызы келешек ұрпаққа үлгі болатын, кейінгі жастар өнеге алатын істердің басында жүріп, ер азаматтармен иық теңестіре еңбек етті. Қоғам жүгін қайыспай көтере білген аналарымыз өркениетті даму жолына түскен мемлекетімізде бірлік пен тұрақтылықтың сақталуына, ел әлеуетін көтеруге қазір де сүбелі үлес қосып келеді, – деп, Еркінбек Нұрахметұлы мен аудандық аналар кеңесінің төрағасы Бақытгүл Демежанқызы аудан әкімінің Алғыс хаты мен сый-сияпатын тапсырды.
Шара барысында кеш кейіпкеріне ұзақ жасаудың сыры, бала тәрбиесі, кеше мен бүгіннің айырмашылығы туралы бірқатар сұрақ қойылып, жиналған көпшілік әженің ақыл-кеңесіне құлақ түрді. Биғайша Нұрзаққызы ұлттық тәрбие, рухани құндылық өлшемі жөнінде кеңінен әңгімеледі. Қазақтың ақ жаулықты анасы дәстүрдің озығын бойына сіңірген ұлттың іргесі сөгілмейтінін айтып, отбасы атты шағын мемлекетте кездесетін кейбір түйткілді жайттарға түсінік берді. Кездесу соңы ауыл өнерпаздарының ән мен күйіне ұласты.
Дәурен ӘБУТӘЛІПОВ,
Кеген ауданы
