Алматы облысында денсаулық сақтау саласын қаржыландыру халық санының өсуі мен медициналық қызмет көлеміне деген қажеттілікті ескере отырып қалыптастырылады. Қаржыландыруды ұлғайту арқылы медициналық көмектің қолжетімділігі де артып келеді. Бұл туралы «Әлеуметтік медициналық сақтандыру қорының» КЕАҚ Алматы облыстық филиал директоры Тілеухан Әбілдаев мәслихаттың денсаулық сақтау, білім беру, халықты әлеуметтік қорғау, мәдениет және спортты дамыту мәселелері бойынша тұрақты комиссиясының отырысында мәлімдеді. Тілеухан Әбілдаевтың айтуынша, 10 ай ішінде облыс тұрғындары МӘМС-ке 32 млрд. теңге жарна төлеген.
«Медицина ұйымдарына көрсетілген қызметтерді төлеу Қор сарапшылары жүргізген мониторингтен кейін жүзеге асырылады. Биыл мониторинг бойынша жалпы сомасы 1 448,6 млрд.теңгеге 233 421 ақау анықталды. Ақаулардың басым бөлігі амбулаториялық-емханалық көмекке тиесілі. Медициналық көмек көлемін жасанды түрде арттыру, стандарттар мен клиникалық хаттамалардан негізсіз ауытқулар, ақпараттық жүйеге мәліметтерді қате енгізу де бар», – деді депутаттар алдында Тілеухан Шілдебайұлы.
Қор өкілі филиалдың 10 айлық жұмысының қорытындысын бөлісті. Оның сөзінше, Алматы облысы бойынша тұрғындар тарапынан түскен арыз-шағымдар саны 1218-ге жеткен. Бұл өткен жылмен салыстырғанда едәуір көп. Ақпаратқа сәйкес, келесідей санаттар бойынша шағымдар санының өскені байқалады: консультациялық-диагностикалық көмек, дәрі-дәрмекпен қамтамасыз ету аясында дәрілік заттармен қамтамасыз етуден бас тарту, бейінді педиатриялық мамандардың жоқтығы және тапшылығы.
«Салада бірқатар мәселе бар. Халықтың сапаға қанағаттану деңгейінің төмендігі, АМСК деңгейінде консультациялық-диагностикалық көмекке қол жеткізудің қиындығы, денсаулық сақтау саласын цифрландырудың төмен деңгейі, медициналық ұйымдардың кредиторлық берешегін айтуға болады», – дейді Тілеухан Әбілдаев.
Қор өкілі мәслихат депутаттарына қалыптасқан күрделі жағдайдың шешу жолдарын да ашық айтты. Бұл қатарда адам ресурстарын дамыту, медициналық ұйымдардың топ-менеджерлерін қаржылық менеджмент бойынша оқыту бар. Жалпы, комиссия отырысында Денсаулық сақтау басқармасы сенімгерлік басқаруға берілген медициналық мекемелердің жұмыс сапасын бақылау туралы, әйелдер мен жаңа туған нәрестелердің денсаулығына тұрақты мониторинг жүргізу, электрондық денсаулық сақтау жүйесін дамыту және күшейту мәселелері туралы баяндады. Бұдан бөлек, әлеуметтік салалар да қамтылды.
«Әлеуметтік медициналық сақтандыру қоры» КЕАҚ Алматы облыстық филиалының баспасөз қызметі
