Футзалдан «бірінші лига» ойындарының республикалық чемпионаты басталды. Үш күнге созылатын жарыстың 1-кезеңі Қарасай ауданындағы «Нұр-Аман» спорт кешенінде өтіп жатыр.
Қарағандыдан «Биосфера» мен «ТЧЭ-14» командалары, Тараздан «Омега», Алматы облысынан «Алатау» командасы чемпиондық титул үшін күреседі. Чемпионат FIFA-ның футзал ойындарына арналған халықаралық ережелеріне сәйкес ұйымдастырылады. Яғни, 5х5 форматында, екі тайм. Ал, әр тайм 20 минуттан.
Ойын үш кезеңнен тұрады. Екінші кезең 2025 жылдың қаңтарында, үшіншісі наурыз айында өтеді. Жарыстың шешуші сериясы (плей-офф кезеңі) 2025 жылдың мамыр айына жоспарланған. 1-лига жеңімпаздары футзалдың Премьер лигасында ойнауға мүмкіндік алады.
Бірінші кезеңде тайталасқан «Алатау» мен «Биосфера» командасы 5-5 есебімен тең түсті.
Аталмыш ойын 1-кезең қатысушылары үшін 2024/2025 жылғы футзал маусымының Қазақстан Кубогына алғашқы қадамы болады. Айта кетейік, Қазақстан Кубогы ойындары 2024 жылдың 21-24 желтоқсанында Ақтау қаласында өтеді.
Ұйымдастырушылар: ҚР Туризм және спорт министрлігі, Алматы облысының дене шынықтыру және спорт басқармасы, «Қазақстан футбол федерациясы», «Қазақстан футзалы Ассоциациясы», «Алматы облысының футбол және футзал федерациясы», «Алатау» спорттық ойын клубы.
