Айдың-күннің аманында жап-жас баланың қыршыннан қиылуы қоғамды есеңгіретіп тастады. Тас түскен жеріне ауыр. Әлпештеп өсіріп отырған баласынан айырылу ата-анаға өте ауыр соққы. Шерзат марқұмның ата-ана, отбасына Алла сабыр берсін.
Бұл жағдайды бас пайдасына асырмақ болып, әлеуметтік желілерде небір видео жариялап, пост жазушылар көбейіп кетті. Көбінің көздегені айдан анық. «Біреуге мал қайғы, біреуге жан қайғының» кейпін келтіріп отырғандар. Істің ақ-қарасына жетіп, байыбына бармай, небір өсек-аяң мен қаңқу сөз жазып, елге кесірін тигізіп жатқандар көбейді. Сондай арам пиғылдыларға айтарым, қоғам тыныштығын бұзып, ел арасына іріткі салмай, соттың әділ шешім шығаруына кедергі келтіруге болмайды. Айтуға оңай болғанымен, қайғыдан қан жұтып отырған отбасына әлеуметтік желілерде жазып жатқан әр сөздің зіл батпан екенін ескеру керек. Сабырмен күтейік. Қылмыскерлер бостандықта тайраңдап жүрмесі анық, жазасын алады. Міндетті түрде заң аясында жауапқа тартылады.
Шаяхмет Құсайынұлы,
Еңбекшіқазақ ауданының Құрметті азаматы
