Апат бола қалған кезде бірлесе қимылдап, жұмыла жұмыс істеу үшін облыс әкімінің тапсырмасы бойынша Қарасай ауданының орталығы Қаскелең қаласында облыстық жұмылдыру дайындығы басқармасы мен төтенше жағдайлар департаменті бірлесе отырып, «Зілзала кезіндегі мемлекеттік қорғаныс жүйесі мен тұрғындардың іс-қимылы» атты жаттығу өткізді.
Бірнеше кезеңге бөлініп өткізілген шараға қаладағы көптеген маңызды нысан қамтылған болатын. Алдымен, Қарасай ауданының әкімдігінде өңірдегі мекемелер мен басқарма басшыларының қатысуымен төтенше жағдайлардың алдын алу және қалпына келтіру жөніндегі комиссияның отырысы өткізілді. Осы жерде жауаптыларға сейсмикалық жаттығу барысында атқарылатын шаралар белгіленіп берілді.
Осыдан кейін жаттығудың тәжірибелік кезеңі басталды.Комиссия мүшелері «Қаскелең автобус паркі» ЖШС-нда болып, азаматтық қорғаныс пен төтенше жағдайлар қызметі жауынгерлерінің дайындығын тексеруден өткізді. Келесі кезекте зілзаладан зардап шеккен халықты, баспанасыз қалған тұрғындарды қауіпсіз жерге көшіру, оларды тізімге алып, дәрігерлік көмек көрсету орталығында болып, мұндағы дайындық сапасына баға берді. Бұл орталық Қаскелең қаласындағы Абай атындағы мектеп-гимназияда орналастырылған.
Жаттығулар сол сияқты «Алтын ауыл» ықшамауданында орналасқан осымен аттас орта мектепте жалғасын тапты. Жоспар бойынша зілзаладан зардап шеккен тұрғындар алдымен осы жерге шоғырландырылып, соңынан Абай атындағы мектепке тасымалдануы керек болатын.
Шамалған ауылында комиссия мүшелері қосалқы орталықтың жай-күйімен танысса, Елтай ауылдық округіне қарасты Көкөзек елдімекеніндегі «Almaty tannery» ЖШС-на тиесілі былғары зауытында өрт сөндіру жаттығулары өткізілді.
Ауқымды іс-шараның қорытындысы бойынша, төтенше жағдайлар бола қалған жағдайда мемлекеттік мекемелер мен халықтың дайындығы сарапқа салынып, оңды нәтижелермен бірге әлі де болса жетілдіре түсетін тұстары атап көрсетілді. «Апат айтып келмейді» дегендей, сейсмикалық қауіпті аймақта орналасқан аудан тұрғындары мен тиісті қызметтер бірлесе әрекет етуге дайын болуы керектігі қатаң ескертілді.
Қуат ҚАЙРАНБАЕВ
Қарасай ауданы
