Балқаш ауданындағы спорт кешенінде 2010-2012 жылдары туған жасөспірімдер арасында грек-рим күресінен облыстық іріктеу турнирі өтті. Аталған жарыс грек-рим күресінің дамуына сүбелі үлес қосқан білікті бапкер, ұлағатты ұстаз Айдархан Сүлейменхановты еске алуға арналды.
Бозкілемдегі бәсекеге 13 команда, 190-ға жуық спортшы қатысып, 12 салмақ дәрежесі бойынша жеңімпаздар анықталды. Жоғары денгейде өткен спорттық шарада бақ сынаған аудандық балалар мен жасөспірімдер спорт мектебінің жас балуандары да жүлдеден құралақан қалмады. Ақтық сында өнер көрсеткен Ақдала орта мектебінің оқушысы Мадияр Бақтығалиұлы 38 келі салмақ дәрежесі бойынша ІІ орын иегері атанды. Ал М.Сеңгірбаев атындағы орта мектеп оқушысы Асхат Есімғали 100 келі салмақта ІІІ орыннан көрінді.
Спорт – денсаулық кепілі. «Шыныққан шымыр болады» демекші, жастайынан дене жаттығуларымен шұғылданып, спорттық секцияларға қатысқан балалар күш-қайраты мықты, шыдамды да жігерлі болып өседі. Сонымен қатар халықаралық жарыстарда абыройы асқақтайды. Олай болса, аудан намысын қорғап, ел мерейін үстем етіп жүрген спортшыларымыздың жеңісті сәттері көп болуына тілектеспіз!
Бақтығали ДӘУІТБАЕВ,
Балқаш ауданы
