Жамбыл ауданында «AMANAT» партиясының сайлауалды бағдарламасы аясында 4 мыңға жуық тұрғыны бар Ақтерек ауылына газ құбыры тартылып, іске қосылды. Газ құбырының ашылу салтанатына аудан әкімі Нұрлан Ертас пен «AMANAT» партиясы Алматы облыстық филиалының атқарушы хатшысы Ерлан Жакупов қатысты.
Биыл аудандағы елді мекендерге газ құбырларын тартуға бюджеттен 6,2 млрд теңге бөлінді. Соның ішінде Ақтерек ауылын газдандыруға арналған жобаның құны 1 млрд 82 млн теңгені құрайды. Жобаны мердігер «Компания ГазСтрой» ЖШС жүзеге асырды.
«Қазіргі уақытта 37 үйге газ қосылған. Алдағы уақытта бұл жұмыстар жалғасып, ауылдың қалған үйлерін де көгілдір отынмен қамтамасыз ету жоспарланып отыр. Оның келуі тек тұрғындардың тұрмысын жақсартып қана қоймай, ауылдағы маңызды әлеуметтік нысандардың жұмысына да оң әсер етеді. Мектептер, дәрігерлік амбулатория, балабақшалар, мешіт және шаруа қожалықтарының қызмет көрсету жағдайлары айтарлықтай жақсарады. Бұл өз кезегінде ауылдың әлеуметтік-экономикалық дамуына тың серпін береді», – деп атап өтті аудан әкімі Нұрлан Ертас.
Сондай-ақ, «AMANAT» партиясының “Жол картасына” сәйкес, 2027 жылға дейін өңірдің газдандыру деңгейін 70 пайызға жеткізу көзделіп отыр.
«Ауданда шешілуі тиіс мәселелерді тұрғындармен бірлесіп талқылап, олардың ұсыныс-тілектерін жинадық. Соның бірі – елді мекендерді газдандыру мәселесі болатын. «AMANAT» партиясының сайлауалды бағдарламасы аясында бүгін Ақтерек ауылына газ беріліп, тұрғындардың көптен күткен арманы орындалды. Бұл жұмыс мұнымен тоқтамайды. Алдағы уақытта басқа ауылдарға да газ құбырын тарту жоспарланып, облыстың газдандыру деңгейі 70 пайызға дейін артады», – деді Ерлан Жакупов.
Айта кету керек, бүгінгі таңда Алматы облысында 1,18 млн адам газға қол жеткізген.
«AMANAT» партиясы
Алматы облыстық филиалының баспасөз қызметі
