«Аssyltas» қоры мен «Хабар» арнасы, Айтыс ақындары мен жыршы-термешілер одағының ұйымдастыруымен өтіп келе жатқан республикалық «ASSYL DOMBYRA» ақындар айтысы биыл да жоғары деңгейде көрініс тапты. Дүбірлі додада әр облыс пен қалалардан келген 20 команда өнер көрсетті. Нәтижесінде Аят Жәнібек бастаған жерлестеріміз «ASSYL DOMBYRA» иегері атанып, бас жүлде 6 миллион теңгені қанжығасына байлады.
Айтыс өнерін халық арасында кеңінен насихаттап, ұлттық дәстүрді жаңғыртуды мақсат еткен рухани шара ақындардың суырыпсалма қабілеттері мен шешендік өнерін шыңдау арқылы жастарды адамгершілікке, имандылыққа, патриоттыққа тәрбилеуді, олардың халық ауыз әдебиетіне деген қызығушылығын арттыруды өз міндеті санайды. Осы орайда жоба жетістіктері мен жемісі де аз емес. Рухани байлықтың еселенуіне ерекше үлес қосылып, жастар арасында айтыс өнерінің айрықша жанданғанын байқауға болады.
Жыр додасында түрлі халықаралық, республикалық айтыстарда өнер көрсеткен ақындар өз облысы атынан сынға түсті. Әр командада 3 ақыннан болып, барлығы 60 ақын өнерлерін ортаға салды. Аят Жәнібектің командасы тақырыпты аша білу тартымдылығымен, дәстүрлі айтыс мақамын үйлестіру шеберлігімен, әдеби тіл байлығының әрлілігімен қазылар алқасының әділ шешімін алып, «ASSYL DOMBYRA» иегері атанды.
Аят Жәнібек Абай атындағы Қазақ ұлттық педагогикалық университетінің магистратурасын тәмамдап, Райымбек ауданы Көксай орта мектебінде қазақ тілі мен әдебиеті пәнінің мұғалімі болып шәкірттеріне үздік білім беруде. Жастайынан қолына домбыра алып, түрлі жыр-термелерді жаттап, айтыс өнеріне айрықша аңсары ауған азамат бүгінде Райымбек аудандық Көдек Байшығанұлы атындағы айтыс және жыр терме мектебінің көркемдік жетекшісі. Домбыраға қызыққан ұл-қыздарды ұлттық өнерге тәрбиелеу жолында үлкен іс атқаруда. Шәкірттері де талай шыңды бағындырып, түрлі байқаулардың бас бәйгесінен көрінген. Аудандық, облыстық, республикалық айтыстарға қатысып. жүлделі орындарға көтерілген балаларды ұстазының жеңісі одан сайын жігерлендіре түсті.
Айтыс ақындары мен жыршы термешілер одағының мүшесі Аят Жәнібекке шығармашылық табыс тілеп, «ASSYL DOMBYRA» иегері атануымен құттықтаймыз. Талай асқар асуларды бағындырып, айтыс өнеріне қосқан тамшыдай үлесі үлкен жетістіктерге жетелей берсін дейміз.
Құралбек СӘБИТОВ
