Алматы қаласында ауыр жүк көліктерінің шамадан тыс жүк тасымалдауына байланысты әкімшілік жауапкершілікке тартылғандар саны артты. 2024 жылдың басынан бері көлік инспекциясы қызметкерлері 119 ауыр жүк көлігін анықтап, оларға Қазақстан Республикасының Әкімшілік құқықбұзушылық туралы кодексінің 571-бабының 6-тармағы бойынша жалпы сомасы 65 551 460 теңге айыппұл салды.
Негізгі құқықбұзушылық – көліктердің рұқсат етілген жүктемеден асып кетуі. Салыстырмалы түрде айтқанда, өткен 2023 жылы мұндай жағдайлар әлдеқайда аз болған – барлығы 34 көлік анықталған.
Ауыр жүк көліктері қала көшелеріндегі жол сапасына елеулі әсер ететіні белгілі. Осыған байланысты Алматы қаласындағы Жол активтері сапасының ұлттық орталығы мамандары көліктік бақылау инспекциясымен бірлесіп рейдтер ұйымдастырады. Бұл шаралар қала жолдарының сапасын сақтап, көлік қозғалысының қауіпсіздігін қамтамасыз етуге бағытталған.
Жол сапасын бақылаушы мекеме мен көлік инспекциясы ауыр жүк көлігін жүргізуші азаматтарды ережелерді сақтауға шақыра отырып, ауыр жүк көліктерінің заңсыз әрекеттерін анықтау жұмысын жалғастыруда.
