Еңбекшіқазақ ауданы Қаракемер ауылында Тәуелсіздік күніне орай көкпар өтті.
Ұлттық спорт эстафеталық әдіспен жылына екі рет ұйымдастырылады. Көктемгі жарыс қаһарлы қыстан аман шыққан халыққа сауын айтып, жаймашуақ жыл басы – Наурыз тойына орайластырылса, қысқы жарыс ел егемендігі үшін ызғарлы желтоқсанда қыршын кеткен жастарды еске алып, Тәуелсіздік күнінде өткізіледі.
Биыл да ақсақалдар мен атқа қонған азаматтар, Еңбекшіқазақ ауданының тұрғындары бұл дәстүрден жаңылмады. Алдыңғы көкпар Жаңатұрмыс ауылында өтсе, бұл жолғы жарыс Қаракемерде жалғасты. Облыстың әр өңірінен жиналған жұрт Желтоқсан құрбандарын еске алып, қыршын кеткен боздақтарға Құран бағыштады. Ақсақалдар жастарға бата беріп, алдағы ойынға сәттілік тіледі. Аудан әкімінің орынбасары Қуат Қарабайұлы сөз сөйлеп, көкпарды ұйымдастыруға атсалысқан халыққа, шабандоздар мен «Арғымақ көкпар» федерациясына алғыс білдірді.
Жарысқа Еңбекшіқазақ ауданының ғана емес, Кеген, Іле, Жамбыл, Талғар, Қарасайдан да кіл мықтылар келіп, көкпардың көркін қыздырды. Аттың құлағында ойнаған жігіттер кең даланы дүбірге бөлеп, елдің делебесін қоздырып, жиналған жұртты рухтандырды.
Көкпар – жай ойын емес, кезінде көшпелі халық үшін әскери машық болғанын ескерсек, бұл – жігіттің сыны, елдің намысы екені сөзсіз. Қол қайраты, тақым күші, батылдығы мен ептілігі асқан, тәжірибелі балуандар мықтылығын танытып, семіз серкені шеңберге бір емес, бірнеше рет салып, көзге түсті. Салым салғандар марапатталып, ақшалай сыйлық табысталды. Еңбекшіқазақ, Кеген, Қарасай аудандарының көкпаршылары көптен озып, жүлделі орындарға ие болды.
Құралай МҰРАТҚЫЗЫ
Еңбекшіқазақ ауданы
