Қонаев қаласындағы орталық саябақта Бердібек Соқпақбаев шығармашылығын паш ететін мүсіндер қойылды. Ұзын орындыққа жайғасқан жазушының бейнесі көрушілерге әсер етпей қоймайды. Тас мүсіннің қасына отырып, қаламгермен сырласқандай кейіпте суретке түсуге болады. Қарсы алдында бір-бірімен әңгіме жарыстырып, ойнап тұрған атақты хикаяттың кейіпкерлері – Қожа мен Сұлтанды көресіз. Бұл игі шараны биылғы мерейтойға қосылған үлкен үлес деп бағалаймыз.
Мүсіндердің ашылу салтанатына облыстық мәдениет, архивтер және құжаттама басқармасының басшысы Данияр Әлиев, Қонаев қаласының әкімі Асхат Бердіханов және қаламгердің қызы Самал Соқпақбаева қатысты.
– Биылғы жыл ел үшін де, біздің әулетіміз үшін де айтулы кезең болды. Күні кеше ғана ЮНЕСКО көлемінде өткен мерейтойдың Парижде қорытындыланғанын жақсы білесіздер. Соқпақпаевтану шарасын жандандыруда Алматы облысы әкімдігінің атқарған жұмыстары өте зор. Күзде жазушының туған жерінде ескерткіші орнатылды. Бүгін қаламгерге арналған құрметтің жалғасып жатқанына куә болдыңыздар. Сондықтан облыс басшыларына жүрекжарды алғысымды айтамын, – деді Самал Бердібекқызы.
Әлем балаларының сүйікті кітабына айналған «Менің атым Қожа» хикаяты әлі де сан ұрпақтың кәдесіне жарайды.
«Мен жиырма бірінші ғасыр ұрпақтарының да құрдасымын», – деп Мұқағали Мақатаев айтқандай, Бердібек Соқпақбаев та жаңа ғасыр адамдарымен бірге болашаққа бет түзейді. Жазушымен сырласуды қалаған жандар бала-шағасын ертіп осы саябаққа келетіндері анық!
Өз тілшіміз
Қонаев қаласы
