«Тіл» оқу-әдістемелік орталығының Ұйғыр аудандық филиалында «ҚАЗТЕСТ» жүйесі бойынша республикалық диагностикалық тестілеу шарасы өтті. Ұйымдастырылып отырған шараның мақсаты – мемлекеттік тілді салаға барынша кеңінен енгізу, іс-қағаздарды қазақша сауатты жүргізу, сол арқылы тілдің мәртебесін көтеру.
Аталған іс-шараға 100-ден астам өңір қызметкері атсалысты. Осы орайда ауданымыздың мемлекеттік және бюджеттік қызметкерлерінің ерікті түрде тест тапсыруы қуантты. Атап айтқанда, ауылдық округ әкімдіктері, аудандық Мәдениет үйі, әл-Фараби атындағы кітапхана, балалар мен жасөспірімдер спорт мектебі, Ұйғыр аудандық ауруханасы, №5 психологиялық-педагогикалық түзеу кабинетінің ұжымы мемлекеттік тілге бейжай қарамайтындарын көрсетті. Мұндай тестілеу бір реттік шара емес. Араға көп уақыт салмай, ауқымды форматта тағы да өткізілді. Тестілеу нәтижесінде мемлекеттік тіл деңгейі пайыздық жүйемен анықталды. 2024 жылы мемлекеттік тіл деңгейін анықтау бойынша республикалық диагностикалық «ҚАЗТЕСТ» нәтижесі қатысушылар арасында 65,7 пайызды құрады. Бұл өткен жылмен салыстырғанда 40,7 пайызға артып отыр.
«Тіл» оқу-әдістемелік орталығының Ұйғыр аудандық филиалында мемлекеттік тіл, іс жүргізу, ағылшын тілі курстары 100 сағаттық бағдарламаға негізделіп оқытылуда. 2024 жылы курсқа 171 мемлекеттік, 71 бюджеттік сала қызметкері, 31 жеке тұлға, жыл бойына 273 тыңдаушы білімдерін шыңдады.
Табиғаттың өзгермейтін заңына бұр бетіңді,
Қай кезде де туған тілің, туған анаң секілді.
Бабалардың арманы бар мына қызыл гүлдерде,
Олар елін, тілін қорғап, жанын қиған бұл жерде, – деп ақын Мұхтар Шаханов жырлағандай, ана тілімізді қадірлеп, өскелең ұрпаққа кеңінен жеткізуіміз керек. Бұл – біздің басты міндетіміз. Қазақ тілінің құдіретін сөзбен жеткізу мүмкін емес.
Тіл болашағының жарқын болуы саналы да қуатты жастардың қолында! Себебі, өркениетке құлаш ұратын елдің өрісі қашанда білікті де саналы ұрпақпен кеңеймек. Ендеше, татулық пен тұрақтылықтың негізіндей болған туған тіліміз тұғырлы, тәуелсіздігіміздің ғұмырлы болуы үшін баршамыз тіл мерейінің жоғарылауы үшін еңбектенуге тиіспіз.
Әйгерім АРЫМБЕК,
Алматы облыстық «Тіл» оқу-әдістемелік орталығы
Ұйғыр аудандық филиалының меңгерушісі
