Облыс әкімі Марат Сұлтанғазиев Талғар ауданына жұмыс сапарымен барды. Аудандағы бірнеше елдімекенді аралап, әлеуметтік және инфрақұрылымдық жобалардың жүзеге асу барысымен танысты. Мектеп құрылысы, сумен қамту, туристік аймақтарды дамыту сынды маңызды мәселелерге назар аударды.
Алғашқы кезекте Тұздыбастау ауылына атбасын тіреген аймақ басшысы 1500 орынды мектептің құрылыс жұмысын көріп, білім беру нысанының жағдайына ерекше көңіл бөлді. Әкім мектеп оқушылары үшін барынша қолайлы жағдай жасау қажеттігін атап өтті. Балалардың барлық мүмкіндігі қарастырылған оқу ошағында сапалы білім алуы олардың үлгерімі мен болашақ жолының дұрыс қалануына тікелей әсер ететінін айтты. Күн санап көркейіп келе жатқан Талғар сынды аудан мен іргелі елдімекендердегі құрылыс ең жоғары сапаға сай болуы керектігін де еске сала кетті.
Келесі кезекте Марат Сұлтанғазиев Бесағаш ауылына барып, онда жүргізіліп жатқан сумен қамту жүйесінің құрылысын бақылады. Ол бұл нысанның стратегиялық маңыздылығына тоқталып, құрылыстың сапалы жүруі мен белгіленген мерзімінде аяқталуы қажеттігін баса айтты.
Облыс басшысы туристік әлеуеті зор Талғар ауданындағы «Сұлусай», демалыс аймақтарына мен «Oi-Qaragai» да атбасын бұрды. Бұл нысандар бүгінде тұрғындар мен қонақтардың көп келетін орнына айналған. Десе де, демалыс аймақтарының ары қарай дамуы үшін инфраструктура мен сервисті жақсарту бағытында қосымша іс-шаралар атқарылуы тиіс. Бұл ретте Марат Елеусізұлы туризмге инвестиция тарту ауданның экономикалық тұрғыда өсуіне, жаңа жұмыс орындарының пайда болуына мүмкіндік ашатынын алға тартып, осы бағытта жұмыс жүргізілу қажеттігін жеткізді.
Жұмыс сапарының соңында облыс әкімі тиісті құрылымдарға Талғар ауданындағы әлеуметтік мәселелерді шешу бойынша нақты шараларды қолға алуды міндеттеді. Сондай-ақ, тұрғындардың өмір сүру сапасын жақсартуға бағытталған жұмыстардың үздіксіз жалғасатынын жеткізді.
Талғар – облыстағы қарқынды дамып келе жатқан ауданның бірі. Мұнда халық көп қоныстанған. Соған орай, әлеуметтік мәселелердің де жиі көтерілетіні заңдылық. Оны уақытылы шешіп, тұрғындарға жайлы жағдай жасау – күн тәртібінен түспейтін жайт.
Алма ЕСЕНБАЙ
Талғар ауданы
