Іле ауданының әкімі Қайыржан Жақсымбетов Ауған соғысы ардагерлерімен кездесіп, маңызды әлеуметтік және қоғамдық мәселелерді талқылады. Басқосу барысында өңір басшысы ардагерлердің қоғамдағы және жастар тәрбиесіндегі орнына тоқталды.
– Ардагерлердің жастарды тәрбиелеудегі, бойларына патриотизм мен ұлттық құндылықтарды сіңірудегі рөлі зор. Олар өздерінің өмір жолында жинаған мол тәжірибесімен бөлісіп, қоғамда көптеген игілікті іс атқара алады. Бұл ретте Ауған соғысы ардагерлерінің жастармен тікелей жұмыс істеп, қоғамның рухани және моральдық құндылықтарын насихаттауы – аса маңызды, – деді аудан басшысы.
Кездесуде ел Президенті Қасым-Жомарт Тоқаевтың Жолдауынан туындайтын міндеттер мен мемлекеттік саясатты жүзеге асырудағы маңызды істер туралы да сөз болды. Ардагерлердің елдің саяси және әлеуметтік өміріне белсенді араласып, қоғамдық іс-шаралардың ортасынан табылуы да маңызды екені айтылды.
Іле ауданында бүгінгі таңда 225 Ауған соғысы ардагері бар. Олар – тарихи оқиғаның куәгері ғана емес, ел дамуына да өзіндік үлес қосқан жандар. Соғыс өртін көрген азаматтардың ерлік істері – бүгінгі ұрпақ үшін үлгі-өнеге. Өңір басшысының айтуынша, ардагерлердің бастамаларын қолдау, олардың қоғамдағы орны мен мәртебесін көтеру – бұл тек аудан үшін ғана емес, еліміз үшін де маңызды іс.
Кездесуде айтылған ойлар мен ұсыныстар ауданның қоғамдық өмірін одан әрі жақсартуға бағытталды. Онда көтерілген мәселелер мен нақты ұсыныстар негізінде ардагерлермен бірлескен жұмыс жоспары жасалмақ. Бұл шаралар қоғамдағы тыныштықты сақтау, ұлтаралық татулық пен бірлікті нығайту, жастардың патриоттық сезімін арттыруды көздейді. Сондай-ақ ардагерлердің қатысуымен алдағы уақытта әлеуметтік-мәдени жобалар жүзеге асырылмақ. Бұл қадам ауданның тұрақты дамуын қамтамасыз етіп, ардагерлер белсенділігінің артуына септігін тигізеді
Бағдат ШОЙБАС
Іле ауданы
