Қазіргі таңда жол-көлік оқиғалары мен түрлі апаттық жағдайлар жиі орын алуда. Әсіресе халық тығыз қоныстанған аудандарда мұндай жайттар күн сайын көрініс табады. Осыған орай сақтық шараларын қамтамасыз етіп, жүргізушілердің жол жылдамдығын бей-берекетсіз арттырмауын қадағалау, қауіпсіздікті сақтау мақсатында түрлі шаралар қолға алынуда.
Қаскелең қаласында көлік жылдамдығын қадағалайтын камералардың көбейе түсуі – бұған дәлел. Олар Абылай хан, Өмірәлі, Байғазиев көшелерінің бойында орын тепкен.
40 км/сағ бойынша көлік жылдамдығын бақылайтын камералар ішінде «Сергек» те бар. Бүгінгі таңда барлығы іске қосылды. Әзірге бұл камера нақты бірнеше орынға ғана орнатылған. Олар Абылай хан көшесінің басы (SDU университетінің маңына), Абылай хан көшесімен қиылысатын Достық, Әлімқұлов, Сәукеле, Наурызбай батыр көшелерінің бойына, құрылыс дүкенінен өткеннен кейін автопарктің қасына, Наурызбай батыр көшесінің бас жағы, демек, «Қарқара» спорт кешенінің маңына, Байғазиев пен Аймауытов көшелерінің қиылысына қойылған. Ал Өмірәлі мен Байжарaсов көшелерінің қиылысында «Сергек» камерасы орын тепкен.
Қарасай аудандық полиция бөлімінің мәліметіне сүйенсек, алдағы уақытта мұндай камералар өңірдегі барлық округтің маңайына орнатылмақ.
Дидар МӘЛІКҰЛЫ
Қарасай ауданы
