Шамалған ауылында орналасқан «Атамекен» тарихи-мәдени орталығында Қазақстан халқы Ассамблеясы мен өзге де қоғамдық ұйымдардың жыл бойы атқарған жұмыстарын қорытындылаған жиын өтті. Алқалы басқосуды аудандық қоғамдық келісім және даму орталығының директоры Дидар Өтемісов ашып, жүргізіп отырды. Ол күн тәртібіне қойылған мәселеге қатысты баяндамасында нақтылы істерге тоқталып өтті.
Атап айтқанда, былтыр ауданда жастарға патриоттық тәрбие беру, татулық пен бірлікті нығайту, ауданда тұратын түрлі этностардың тілдерін сақтау мен дамытуға бағытталған 145 шара өткізілген. Оған 10 мыңнан аса адам қатысып, аудандық ақсақалдар мен аналар кеңесінің, этномәдени орталықтардың, «Ассамблея жастары» мен өзге де қоғамдық бірлестіктердің мүшелері белсене атсалысқан.
Қол жеткен табыстар да баршылық. Облыс көлемінде өткізілген көркемөнерпаздар жарысында қарасайлықтар бас жүлдені жеңіп алса, республикалық «Батагөй» байқауында – екінші, ал «Жылылық күннің көзінде – тәрбие әженің сөзінде» атты аламанда үшінші орынды иеленген. Сонымен қатар «Өнерім саған – Қазақстан!» атты республикалық байқауда Шамалған ауылының тұрғыны Сабир Гусейнов Гран-при жүлдесін, ал Қаскелең мәдениет колледжінің студенті Тимур Ким бірінші орынды еншілеп, ауданның мерейін асқақтата түскен.
Қайнар ауылындағы орта мектептің 11-сынып оқушысы Роман Ілиясов «Өнерлі өрге жүзер» атты облыстық байқаудың бас жүлдегері атанды. Оның жыл қорытындысына арналған басқосуда домбырада күмбірлете күй шертіп, жиылған жұртшылықты тамашаға бөлегені тағы бар. Қарасай аудандық «Ассамблея жастары» бірлестігінің жетекшісі Ясми Мчелидзе де қазақ тілін дамытуға қосқан ерекше үлесі үшін ҚР Ғылым мен жоғары білім министрінің Алғыс хатымен марапатталды. Қаскелең гуманитарлық-техникалық колледжінде оқып жүрген Асми мемлекеттік тілді меңгеріп қана қоймай, жастар арасында насихаттауға да өз үлесін қосып келеді. Ал оқуын бітіргеннен кейін бастауыш сынып оқушыларына қазақ тілінен дәріс беруге белін бекем байлап отыр.
Жиын барысында сөз алған Шамалған ауылдық округінің әкімі Нұрсұлтан Жолдасбек, аудандық ардагерлер кеңесінің төрағасы Сағат Мәсімақынов, «Ахыска» түрік этномәдени орталығының жетекшісі, заңгер әрі медиатор Илимдар Камилов атқарылған істерді баяндай келе, алдағы жоспарларымен бөлісті. Олар сталиндік репрессия жылдары жер аударылған этностарға қарапайым қазақтардың қалай көмектескені, солардың арқасында тура келген ажалдан аман қалып, бүгінде өсіп-өркендеп отырғандары жайлы да ақтарыла сыр шертті.
Салтанатты жиынның соңында Шамалған ауылының әкімі Нұрсұлтан Жолдасбек қоғамдық жұмыстарға белсене қатысқан жекелеген тұрғындар мен этномәдени орталықтардың мүшелеріне аудан әкімінің орынбасары Бексұлтан Ақылбектің атынан Алғыс хаттар табыс етті.
Қуат Қайранбаев,
Қарасай ауданы
