Табысқа жету үшін қарекет керек. Бақытын еңбектен тапқан жандардың қоғамдағы орны да ерекше. Осындайда барлық саланы ұршықша иіріп әкететін епті адамдарға қарап сүйінесің. Солардың бірі – Кеген ауылының тұрғыны Дулат Ілікұлы.
Таулы өңір тұрғындарының басым көпшілігі мал шаруашылығымен айналысатыны белгілі. Шаруалар жылдың төрт мезгілінде де тырбанып тіршілік жасаудан еш танған емес. Ал біздің бүгінгі кейіпкеріміз бөдене өсіруді қолға алған. Оның еті мен жұмыртқасы адам ағзасына пайдалы екенін естіп біледі.
– Бұл кәсіпті әуелде ақша табу үшін бастаған жоқпын. Өнімін өзіміз тұтынайық деп шештік. Сол оймен былтыр күзде Алматыдан 20-30 бас құс сатып әкелдім. Біреуінің құны мың теңге тұрады екен. Алдымен бөдене тұратын орынды жылылап, тордың ауқымын кеңейттім. Өйткені олар суық жерде жұмыртқаламайды. Тұрақты 16-18 градус жылы температура қажет. Әсіресе қыс мезгілінде йодталған су мен азықты көптеп беру керек. Оған бидай, жүгері, соя және балық ұны кіреді. Сонда ғана өнімі ойдағыдай болады, – дейді Дулат.
Бөденелерге дұрыс күтім жасағанның арқасында, олар күніне 20-30 дана жұмыртқа бере бастайды. Сөйтіп өздерінен артылғанын дүкендерге өткізіп, пайда табуға көшеді. Бүгінде кәсібін кеңейтіп, құс санын арттырып отыр.
– «Ақ гигант», «Феникс» тұқымына жататын 200 бөдене бар. Олар күніне 170 жұмыртқа береді. Бастаған ісімнің отбасыма да, елге де пайдасы тиіп жатқанына қуаныштымын, – деген бөдене өсіруші Дулат Ілікұлы болашақта жұмыс ауқымын одан сайын арттыруды көздеп отыр.
Дәурен ӘБУТӘЛІПОВ,
Кеген ауданы
