Алматы облысы – елімізде газдандыру процесі қарқынды жүргізіліп жатқан өңірлердің бірі. Бұған облыс аумағынан ірі магистралды газ құбырларының өтуі де өз ықпалын тигізіп отыр деуге болады. Өңірде елдімекендерді көгілдір отынмен қамтамасыз ету жұмыстарының жай-жапсары туралы Алматы облысы әкімінің орынбасары Нұржан Құдайбергеновтен сұрап білген едік.
– Нұржан Кеңесұлы, облыста осы уақытқа дейін қанша елдімекен газдандырылды және қазіргі уақытта аймақта жұмыс істеп тұрған ірі магистралды газ құбырларының жағдайы қандай?
– Облыста 284 елді мекен газдандыруға жатады, олардың 159-ы (56%) газдандырылған, 1,2 миллион адам (77%) газбен қамтылған.
Бүгінде аймақта «Алматы-Талдықорған», «Алматы-Байсерке-Талғар», «Алматы-Байсерке-Талғар»-дың 2-желісі, «Байсерке-Қапшағай», «Ташкент-Бішкек-Алматы», «Қазақстан-Қытай» ірі магистралды газ құбырлары жұмыс істейді және «Шелек-Кеген-Нарынқол» газ құбыры тартылып жатыр.
Сонымен қатар, «Алматы-Байсерке-Талғар» магистралды газ құбыры бойынша ішкіқұбырлық диагностика жүргізілді, ал «Алматы-Талдықорған» магистралды газ құбыры бойынша диагностика жалғасуда.
– 2024 жылы қанша елдімекен көгілдір отынға қол жеткізді және оның жергілікті тұрғындардың әл-ауқатын көтеруге ықпалы қандай?
– 2024 жылы 17 жаңа газдандыру нысаны іске қосылды. Атап айтсақ, Жамбыл ауданының Бірлік, Ақтерек, Ақсеңгір, Көкдала, Жайсан, Б. Қыдырбекұлы, Беріктас, Дегерес, Қазыбек бек ауылдары, Іле ауданының Жаңаарна, Еңбек ауылдары, Талғар ауданының Арқабай, Көктал, Қайнар, Төңкеріс ауылдары, Ұйғыр ауданының Бахар, Шарын ауылдары. Бұл жұмыстар облыста 30 мыңнан астам тұрғынның тұрмыс сапасын жақсартуға ықпал етті.
Бұдан бөлек, 18 жобаның мемлекеттік сараптамасы оң қорытындысын алды. Бұл жобалар іске асырылса өңірде 600-ден астам уақытша және 20 тұрақты жұмыс орны ашылады. (Балқаш ауданы – Береке; Еңбекшіқазақ ауданы – Талдыбұлақ, Сатай, Қаракемер, Нұрлы, Мақсат, Достық, Лавар, Қорам, Қаратырық, Дихан, Қаражота, Шелек-Кеген-Нарынқол; Қарасай ауданы – Қарасай, Талғар ауданы – Дәулет; Қонаев қаласы – ДГД және 5 шағын аудан).
– 2025 жылдың соңына қарай аймақтағы газдандыру деңгейін қанша пайызға жеткізу жоспарланып отыр?
– 2025 жылы Балқаш, Жамбыл, Талғар, Ұйғыр аудандарында 12 жобаны іске асыруға 3,75 млрд теңге бөлінді. Оның 250 миллионы республикалық бюджеттен бөлінсе, 3,5 млрд теңгесі жергілікті бюджеттен қарастырылған.
Сонымен қатар, облыстық бюджеттен 29 жобалық-сметалық құжаттама әзірлеуге 1,4 млрд теңге бөлінді, ол: (Балқаш ауданы – Бура, Ұшжарма, Ақкөл; Еңбекшіқазақ ауданы – Ақши, Қайрат, Балтабай, Болек, Аймен, Алға, Койшыбек, Базаокельді, Космос, Қызылшарық; Талғар ауданы – Озтерім, Нұра, Тұғанбай; Іле ауданы – Қуйған; Ұйғыр ауданы – Кіші Дихан, Үлкен Дихан, Көлжат, Кетпен).
2025 жылдың соңына дейін аймақтың газдандыру деңгейі 59,8 пайызға дейін арттырылып, 170 елдімекенге табиғи газ беру жоспарланып отыр. Қалған 114 елдімекен 2030 жылға дейін газдандырылады деген жоспар бар.
– Сұхбатыңызға рахмет!
Өз тілшіміз
