Жамбыл ауданы Қарғалы ауылындағы «Сәт» мешітінде жасөспірімдер арасында Құран оқудан байқау өтті. Шара Қазақстан мұсылмандары діни басқармасының Алматы облысы өкілдігінің қолдауымен ұйымдастырылды. Байқауға аудандағы 12 мешіттің имамдары мен қариялары, діни ұстаздар қатысты.
«Сәт» мешітінің бас имамы Сейітқали-Серік қажы Ыбытаев өз сөзінде шараны ұйымдастырудағы негізгі мақсатқа тоқталды. Ол бабалар аманатына адалдық таныту, Құран құндылықтарын кеңінен дәріптеу, қасиетті кітабымызға құрмет көрсету мәдениетін қалыптастыру туралы айтты. Байқаудың шарттарын түсіндіріп, қатысушыларға сәттілік тіледі.
Құран жарысы негізгі екі кезеңнен тұрды. Алғашқы сында қасиетті кітаптың 30 парасынан сайыс өтті. Екінші кезеңде «Уәддухәә»-дан төмен қарай білімдері сыналды. Оқушылардың өнеріне «Рахымберген қажы» мешітінің наиб-имамы Омар Набижанов қазылық етіп, ұпай санымен бағалап отырды. Жасөспірімдер өзара бақ сынасып, білімдерін шыңдау барысында 7 жастан бастап 12 жасқа дейінгі балалардың Құран оқуды жақсы меңгергені көңіл қуантты. Байқау қорытындысында үздік деп танылған жеңімпаздар салтанатты жағдайда марапатталды.
Алғашқы кезең бойынша 30-шы параны толық жаттағандар арасында І орынды Сабыр Омар жеңіп алып, мерейі үстем болды. ІІ орынға Садық Ибрагим ие болды. ІІІ орындар Біләл Дұғабаев, Сабыр Мамаев және Абдулла Рахметоллаға бұйырды. Екінші кезең бойынша бас жүлдеге Мыңбаев ауылынан келген Байболат Мұхамбет лайық деп танылды. Бірінші орын «Майбұлақ» мешітінен қатысқан Ержан Мұхамбетке берілді. Екінші орынға «Шынасыл» мешітінен Сәукен Жетес ие болды. Үшінші орындарды «Сәт» мешітінен бағын сынаған Алмас Нұрдосұлы, Бақыт Бермұханбетұлы, Сағдат Халмұрат және «Найманбай» мешітінен Есен Ерасыл өзара бөлісті.
Құран оқу байқауының жүлдегерлеріне ақшалай сыйақы берілді. Қалған қатысушыларға облыстың бас имамы Мадияр Тағайбайұлының Алғыс хаты табысталды.
Серік САТЫБАЛДИЕВ,
Жамбыл ауданы
