Коньки спортының жастар арасындағы турнирі өз мәресіне жетті. Сайыс Қонаев шаһарындағы №5 қалалық жағажайдың мұз айдынында ұйымдастырылды. Қатысушылар 100 метрге жүгіру және 400 метрге командалық эстафета сынды дода бойынша сынға түсті. Білім ошақтарының 50-ден аса білімгерлері бақ сынады..
Алдымен спорт фестивальінде Қонаев қаласы әкімдігі мен Алматы облысының дене шынықтыру және спорт басқармасының өкілдері құттықтау сөз сөйледі. Ұйымдастырушылардың сөзінше, іс-шараның негізгі мақсаты – жас студенттерді дене шынықтыру мен спортқа жүйелі түрде баулу, конькимен сырғанау спортын кеңінен насихаттау.
«Аталмыш қысқы спорт сайысы жас қыздар ұлдарды салауатты өмір салтын ұстануға шақырады. Сондай-ақ, үздік спортышларды анықтауға көмектеседі. Жақында мұз айдынының ашылуы баршаға үлкен қуаныш сыйлады. Тек спортта емес, демалыс үшін де жақсы алаң болатыны сөзсіз. Көк мұзда, таза ауады сырғанау, көңіл-күйдің де жақсаруына көмектеседі», – деді Қонаев қаласы әкімінің орынбасары Төлеген Кенжебеков.
Додада өз жас санатында жекелей сында №1 Ы. Алтынсарин атындағы орта мектептің атынан шыққан Нұрдәулет Екпінбай жеңімпаз атанды. Қыздар арасында А.Жұбанов атындағы №5 орта мектеп білімгері Жібек Нұртілеу мәре сызығын бірінші болып кесті.
«Конькимен сырғанау бала кезден мен үшін сүйікті іс. Мұз айдынының ашылғанына бек қуаныштымын. Біз достарымызбен жиі келеміз. Бұл эктремальді спорт түрі болған соң керемет сезім сыйлайды. Бала кезден конькимен сырғанап жүрсем де, сайысқа бірінше рет қатысыпе отырмын. Жеңімпаздардың қатарында көрінгеніме шынайы қуанып тұрмын. Сайыс ұйымдастырушыларына көп рақмет!», – деді Жібек Нұртілеу.
9-11 сынып оқушылары арасында бірінші болып 100 метр қашықтықты бағындырғандар: А.Жұбанов атындағы №5 орта мектептің оқушысы Руслан Қойчиманов пен Қонаев атындағы орта мектептің оқушысы Жасмин Жабықбай.
6-8 сынып оқушылары арасында өткен командалық эстафетада №3 жалпы орта білім беретін мектептің жас спортшылары үздік деп танылды.
9-11 сынып оқушылары арасында 1 орынды №1 Ы. Алтынсарин атындағы орта мектебінің өкілдері иеленді.
