2025 жылы Ұлы Отан соғысындағы Жеңістің 80 жылдығына дайындалу және оны мерекелеу жөніндегі “Ұлы Жеңіс: Ерлікке тағзым, ұрпаққа үлгі” атты іс-шаралар жоспарына сәйкес Алматы облысы Алатау қаласы Заречный ықшам ауданында орналасқан 3660 әскери бөлімінің әскери қызметшілері Қонаев қаласында тұратын Екінші дүниежүзілік соғыстың ардагері Оксана Бетебаеваның үйіне барып, мереке қарсаңында құттықтап қайтты. 3660 әскери бөлімі алдымен Қонаев қаласындағы Ұлы Отан соғысы ардагерлеріне арналған ескерткішке барып гүл шоқтарын қойып, «Мәңгілік алау» алдында тағзым етті.
Биыл кейуана мерейлі 105 жасқа келеді. Жылдағы дәстүрге сай жылы тілектерін айтып, сый-құрмет көрсетті. Оксана Бетебаева 1920 жылы Украинада туған. Украина КСР Полтава облысының тумасы, жеті жылдық мектептен кейін медициналық училищеге түсіп, оны бітіргеннен кейін Петрово-Роменск аудандық ауруханасында медбике болып жұмыс істеді. 1941 жылы шілдеде 20 жасында Оксана Демидовна әскерге шақырылып, Полтава қаласының №1668 әскери госпиталінде қызмет етті. ІІ дәрежелі Отан соғысы ордені, Жуков медалі және басқа да мерейтойлық медальдармен марапатталған. Соғыстан кейін қазақ азаматымен тағдыр қосқан. 1958 жылы Жаркентке көшіп келіп, кейін жұмыс бабымен қазіргі Қонаев қаласына (Қапшағайға) ауысқан. Ардагер Оксана Бетебаева зейнет жасына шыққанша мектепте медициналық зертхана меңгерушісі болып жұмыс істеген. Ол Қонаевтағы көзі тірі жалғыз соғыс ардагері.
Ардагерге аса құрмет көрсетіліп гүл шоқтарымен қатар тәтті торттарын сыйға тарқандар қатарында 3660 әскери бөлімінің тәрбие және әлеуметтік-құқықтық жұмыстар бөлімшесі бастығы капитан Елдес Қазыбек, клуб бастығы капитан Медет Байсапаров және тәрбие және әлеуметтік-құқықтық жұмыстар бөлімшесінің бір топ офицерлері барды. Соғыс жылдарында ол жарақат алған офицер Бекежан Бетебаевпен кездесті. Кейін оған үйленді. Фашистік Германияны жеңгеннен кейін жас жұп Қазақстанға келді. Қазір Оксана Демидовна Қонаевта туыстарымен бірге тұрады, ол – қала тұрғындарының тірі аңызы мен мақтанышы.
Әлия Абдыгалиева, лейтенант, 3660 әскери бөлімінің
тәрбие және әлеуметтік-құқықтық бөлімше бастығының аға көмекшісі
