Ахат аға Солтанқұлов – жасы 77-ге таяса да белсенді өмір салтын ұстанатын ардагер. Зейнеткерлікке шыққанға дейін түрлі мекемеде басшылық қызмет атқарып, Талғар қаласының әкімі болған. Жастайынан ақыл-ойдың ойыны саналатын шахматқа өте әуес болып өскен ол қай қызметте жүрсе де бұл ойынды тастамаған. Соның арқасында аудандық, облыстық, тіпті республикалық додаларда жүлдегер, жеңімпаз атанып, әсіресе Талғар ауданындағы әуесқой және кәсіби шахматшыларға есімі кеңінен танылған және ауданда шахматты дамытуға өзіндік үлес қосқан тәжірибелі шахматшы.
Бүгінде сексеннің сеңгіріне жақындаса да Талғар аудандық ақсақалдар кеңесінің төрағасы ретінде қоғамдық жұмыстарға белсене қатысып жүрген ағамыз сонымен бірге аудандық шахмат федерациясының атқарушы директоры қызметін атқарады. Оның үстіне «Өнерді үйрен де жирен» демекші, балалардың шығармашылығын дамытатын «Пифагор академиясы» білім беру орталығында балабақша жасындағы бүлдіршіндерден бастап, мектеп оқушыларына дейін шахмат ойынын үйретеді.
– Әрине, үйірмеге келген балалардың бәрі мықты шахматшы болып кете бермейді. Бірақ, шахмат ойынының ережесін, басты талаптарын үйреніп шығады. Соңғы үш-төрт жылда біздің академияда жүздей бала шахмат ойынын меңгерді. Олардың көбі 3-ші, 4-ші разрядты ойыншы деңгейіне дейін жетті, ал оншақты бала 1-ші, 2-ші разряд нормаларын орындады. Біз олармен әрі қарай жұмыс істеп, шеберліктерін шыңдай түсеміз.
Жалпы, Талғар ауданы бойынша 15-тей шахмат ойынын үйрететін, соның ішінде қалада – 6, Тұздыбастау ауылында – 3 және Белбұлақ, Бесағаш, Қызылқайрат ауылдарының әрқайсысында бір-екіден үйірмелер бар. Солардың арқасында ауданда шахмат ойыны қарқынды дамып келеді. Енді шалғай ауылдарда да ашуды қолға алмақпыз. Өйткені Президентіміздің өзі «Қазақстан шахмат ойыны дамыған 10 елдің қатарына енуі керек» деген талап қойып отыр. Ол орынды да. Себебі, шахмат – балалардың ойлау қабілетін дамыту арқылы ақыл-ойының толысуына, жоспарлы әрекет етуіне, сабырлы, ұстамды мінез қалыптастыруға көп көмегін тигізеді. Талғарда орта ғасырлардың өзінде шахмат ойыны болған, – дейді ардагер ақсақал, балаларды шахмат ойнауға баулып жүрген байыпты бапкер.
Құтмағамбет ҚОНЫСБАЙ,
Талғар ауданы
