Талғар ауданы Алматы облысының экономикалық донорына айналып келеді. Бұл туралы аудан әкімі Танат Айдарбеков баспасөз мәслихатында мәлімдеді.
Олай айтуға негіз де жоқ емес. 2024 жылы жергілікті бюджетке 31,2 млрд. теңге түсімдер жиналып, жоспар 104.% орындалды.
Салық базасын ұлғайту мақсатында бюджетке 732 млн. теңге түсті. Бюджет шығындарының көлемі 20,1 млрд. теңгеге жетіп, жоспар 93,7 %-ға игерілген жайы бар. Өндірісі де өркендеген. Өндіріс көлемі 2023 жылмен салыстырғанда 11,4 млрд. теңгеге артып, 99,1 млрд. теңгеге жеткізілді.
7 жаңа өндіріс орындары ашылып, 101 адам жұмыспен қамтылды, барлығы 8,6 млрд. теңге инвестиция тартылды. ШОБ ісі де алға басқан. Бүгінгі күні ауданда 22 мыңнан астам шағын және орта бизнес субъектісі жұмыс істейді.
Танат Есенкелдіұлының айтуынша, кәсіпорындар санының артуымен қатар олар өндіретін өнім көлемі де ұлғайып келеді. Бүгінде бұл көрсеткіш 358,1 млрд. теңгені құрап, бюджетке 30,4 млрд. теңге түсімдер жиналған. Ол жалпы бюджеттің 20,3 пайызын, аудандық бюджеттің 85 пайызын құрайды.
«Әр жылдардағы тәжірибеге сүйенсек нарық кезеңінде экономиканың өрлеуі инвестицияның өсуіне байланысты болады. Негізгі капиталға тартылған инвестиция көлемі 124,6 млрд. теңгеге жетті, бұл 2023 жылмен салыстырғанда 16,9 млрд. теңгеге көп», – дейді Талғар ауданының әкімі Танат Айдарбеков.
Өндірісі ілгері басқан өңірде құрылыс қарқынды. Былтыр ауданда құрылысқа 60,6 млрд. теңге жұмсалып, 2024 жылы 287,1 мың шаршы метр тұрғын үй салынып, пайдалануға берілген.
Бүгінгі күні Талғар қаласында 9 қабатты 72 пәтерлік 3 тұрғынүйдің және аудан бойынша 10 жеке тұрғын үй кешендерінің құрылыс жұмыстары жүргізілуде.
Аудан басшысы комуналдық мәселелер де өз ретімен шешімін тауып жатыр дейді. Соның ішінде ауыз судан тапшылық жоқ екеніне сендірді. Бүгінгі күнге 46 елдімекеннің 45-і орталықтандырылған су жүйесіне қосылған, яғни қамту деңгейі 97,8 пайызды құрайды. Ал, көгілдір отынды аудандағы 31 елді мекеннің халқы тұтынып отыр.
«Кіші Байсерке, Еламан, Көктал, Төңкеріс, Арқабай ауылдарында газдандыру жұмыстары жүргізілуде», – деп атап өтті Танат Есенкелдіұлы.
Ауданның айнасы саналатын жол саласында да бірталай істер атқарылған. Өңірдегі жолдардың жақсы жағдайдағы үлесі 65 %-дан 67%-ға өсті. Жол жөндеу жұмыстарына тоқталсақ, 2024 жылы бюджеттен 2,4 млрд. теңге қаражат қарастырылып, 63,2 шақырым жол жөндеуден өтіп, 22 жарықтандырылған жаяу жүргіншілер өткелі, 40 аялдама, 3 бағдаршам орнатылып, бүгінгі күні іске қосылды.
