Сауда және интеграция министрлігінің Техникалық реттеу және метрология комитеті Қазақстанда курьерлердің тамақ жеткізу қызметіне қойылатын жаңа талаптарды бекітті. Комитеттің “Қоғамдық тамақтану қызметтері.
Тұтынушылардың тапсырысы бойынша қоғамдық тамақтандыру өнімдерін жеткізу. Жалпы талаптар” құжаты 2025 жылдың 1 қаңтарынан бастап қолданысқа енгізілді. Стандартты Сауда және интеграция министрлігі Сауда Комитетінің бастамасы бойынша Қазақстан стандарттау және метрология институты әзірледі.
«Осы стандартты қолданудан қоғамдық тамақтандыру өнімдерін жеткізу нарығындағы талаптардың ашықтығы мен бірізділігі қамтамасыз етіледі, тұтынушылардың көрсетілетін қызметтерге деген сенім деңгейі артады және Қазақстан Республикасында азық-түлік қауіпсіздігі жүйесінің нығаюына ықпал етеді», – деп атап өтті Техникалық реттеу және метрология комитетінің төрағасы Жанна Есенбекова.
Тарқатып айтсақ, стандартқа сәйкес курьерлерде медициналық тексеруден өткені туралы белгісі бар белгіленген үлгідегі жеке медициналық кітапша болуға тиіс және олар кәсіби гигиеналық дайындықтан өтуге, сондай-ақ жалпы қабылданған нормалар мен мінез-құлық ережелерін басшылыққа алуға тиіс.
Бұдан басқа, тұтынушыларға тапсырыс арқылы жеткізілген тамақтың жолай сыртқы қаптамасы зақымданбағанын тексеруге мүмкіндік беріледі. Жаңа талаптар мейрамханалардың, кафелердің, логистикалық компаниялардың және курьерлердің тамақ жеткізу қызметінің сапасын арттыру мақсатында қабылданып отыр.
