Бүгін Мемлекет басшысы Қасым-Жомарт Тоқаев “Ана тілі” газетіне берген мақаласы жарық көрді. Ел басшысы мақала да біраз мәселелерге тоқталып, бірыңғай уақыт белдеуі туралы, Талғардағы қылмыстық оқиғаға қатысты өз пікірін білдірді. Әсіресе, Мемлекеттік тілге қатысты: “Қазақ тілінің бәсекеге қабілеті және оны үйренуге деген қызығушылық барынша артып келеді. Ең бастысы, қазақ тілін білу сәнге айналды, жастарымыз оны меңгеруге ұмтылатын болды. Мемлекеттік тіл азаматтардың қызмет бабында өсуіне және табысқа жетуіне жол ашатын маңызды фактор саналады. Еліміздің бизнес өкілдері маркетинг саласындағы науқандарын қазақ тілінде сөйлейтін тұтынушылардың сұранысына қарай өткізетін болды. Мұның бәрі мемлекеттің өте абай болуды қажет ететін әрі саяси тұрғыдан маңызды саналатын осы саладағы саясаты тиімді жүргізіліп жатқанын көрсетеді”, – деді Президент. Мемлекет басшысы дүние жүзінде 7 мыңнан астам тіл бар екенін атап өтті. “Соның ішінде үш мыңнан астам тілге жойылып кету қаупі төніп тұр. Қазақ тілі бұл топқа кірмейді. Ана тіліміз 2024 жылы әлемде ең кең таралған тілдердің арасында 79-шы орынға тұрақтады. Осы ретте күрделі әрі қарама-қайшылыққа толы кеңес заманында ана тілімізді әлемдік лингвистика картасынан жойылып кетуден сақтап қалған зиялы қауым өкілдерінің, ақын-жазушылардың, журналистер мен ғалымдардың, мұғалімдер мен мәдениет қайраткерлерінің, ауыл еңбеккерлерінің, яғни барша отаншыл азаматтардың еңбегін бағалауымыз керек. 2023 жылы “Қазақ тілі” қоғамының бастамасымен құрылған арнаулы қорға қолдау көрсету керек. Цифрлық технологияларды қолдануға баса мән берген жөн. Өйткені қазақ тілінің алдағы тағдыры, еліміздің жаһандық бәсекеге қабілеті көбіне осыған байланысты болады”, – деді Мемлекет басшысы. Оның сөзінше, шығармашыл жастар және креативті индустрия мемлекеттік тілді дамыту ісіне пайдасын тигізе алады.
Сондай-ақ, Президент елдегі бар жағдайды көріп-біліп отырғанын мәлімдеді.
Қызыр Әбжанбаев,
Сәдуақас Серкебаев атындағы мектеп-гимназиясының тәрбие ісі жөніндегі орынбасары, аудандық әкелер кеңесінің төрағасы
