Талғар ауданы Бесағаш ауылдық Мәдениет үйінде тоғызқұмалақтан облыстық чемпионат өтті. Аталған жарысты облыстық дене шынықтыру және спорт басқармасы, дене шынықтыруды және спортты дамыту орталығы және облыстық тоғызқұмалақ федерациясы ұйымдастырды.
Жарыстың ашылу салтанатына «Respublica» партиясы Алматы облыстық филиалының төрағасы, аймақтағы тоғызқұмалақ федерациясының президенті Жарас Ниязбек, Талғар аудандық мәдениет, спорт және тілдерді дамыту бөлімінің басшысы Фарида Бегенбаева, аудандық дене шынықтыру және спортты дамыту орталығының директоры Жандос Бұсырманов, шахматтан және үстел ойындарынан мамандандырылған балалар мен жасөспірімдер спорт мектебінің директоры Мерей Айнеков және басқа да мәртебелі меймандар қатысып, ұлттық спортымыздың тасын өрге домалатып, кеңінен насихаттап жүрген азаматтарға алғыс білдіріп, қатысушыларға сәттілік тіледі.
Үш күнге созылған бәсекеге аудандар мен Алатау, Қонаев қалаларынан шеберліктерін шыңдап, әртүрлі деңгейдегі жарыстарда бақ сынап жүрген жас жігіттер мен қыздар және спорт ардагерлері қатысты. Жалпы 90-нан астам ойыншысы бар 11 команда тоғызқұмалақтың классикалық және блиц түрінен сынға түсті.
Чемпионат қорытындысы бойынша, жарыстың классикалық түрінен ұлдар арасында Ернұр Батыр, Кенжебек Әлназаров, Нұрғиса Ахмет, Иманғали Оразбай жүлдегер атанса, қыздар арасында Мөлдір Байдәулетова, Томирис Дәулетбек, Ақерке Шамшархан, Меруерт Қуатқызы дара шықты.
Блиц ойынынан ұлдар арасында тағы да Ернұр Батыр жеңімпаз атанса, 2-4 орындарға Әрсен Есентай, Иманғали Оразбай, Ислам Балағаз жайғасты. Ал қыздар арасында Ақнұр Мақсатқызы, Томирис Дәулетбек, Ақерке Шамшархан және Перизат Ермекқызы сәйкес орындарға ие болды. Жеңімпаздар мен жүлдегерлер бағалы сыйлықтар, тиісті диплом және Алғыс хаттармен марапатталды.
– Бұл жарыстың мақсаты – тоғызқұмалақты облыс тұрғындарына кеңінен насихаттау, мықтыларды анықтау және қатысушылардың ойын дағдыларын жетілдіру. Аталған чемпионат ұлттық ойынымызды серік еткен үлкен-кіші жастағы жерлестеріміздің қатары жыл сайын көбейіп келе жатқанын көрсетті. Бұл біз үшін үлкен қуаныш әрі мәртебе, – деді тоғызқұмалақтан Алматы облысының аға жаттықтырушысы Болтай Адият.
Иә, шынында да ұлттық спорт ойындары ұрпақ бойында адамгершілік қасиеттерді нығайтып, жас жеткіншектердің намысты, отаншыл болып өсуіне зор ықпал ететіні анық. Осы істі ұтымды ұйымдастырып, әлемдік және халықаралық жарыстарда ел мерейін үстем ететін болашақ чемпиондарды баптап жүрген жаттықтырушыларға, жетістіктер жолында тер төгіп жүрген спортшыларға толағай табыс тілейміз!
Құтмағамбет ҚОНЫСБАЙ
Талғар ауданы
