2018 жылдың маусым айында елімізде Белсенді ұзақ өмір сүру орталықтары ашыла бастады. Мақсаты – әр өңірде тұратын зейнет жасындағы адамдарды әлеуметтендіру, оларды мәдени-шығармашылық, спорттық және іскерлік өмірге тарту. Осынау игі іс Кеген ауданында да жалғасын тауып, қарттарға арналған орталық өз жұмысын бастады.
Аудан әкімі Нұрбақыт Теңізбаевтың төрағалығымен жаңа мекеменің қызметі туралы жиын өтті. Басқосуға облыстық «Белсенді ұзақ өмір сүру орталығы» КММ-ның басшысы Жәния Сақташева, облыстық аналар кеңесінің төрағасы Гүлнар Жошыбаева қатысты.
Кездесуде аудан әкімі Нұрбақыт Молдахметұлы мұндай мекемелер ауылдық округтерде де ашылса деген ұсынысын білдірді. Орталық басшысы Жәния Көпжүрсінқызы оған да мүмкіндік қарастырылатынын жеткізді.
Орталықтың аудандық филиалында шахмат, тоғызқұмалақ, музыка, иога, цигун, скандинавиялық жүріс, еңбек терапиясы мен әлеуметтік қызметтер көрсетіледі. Филиал кеңесшісі болып аудандық аналар кеңесінің төрағасы Бақытгүл Демежанқызы тағайындалды. Сонымен қатар мұнда білім дәрежесіне сәйкес мамандарды қабылдау жүргізіліп, қызмет алушыларды тіркеу басталды.
Аталған орталыққа ауданның зейнетке шыққан кез келген тұрғыны келе алады.
Дәурен ӘБУТӘЛІПОВ
Кеген ауданы
