ҚР ҰҚК Шекара қызметі Алматы облысы бойынша шекара басқармаларының техникалық және кәсіби даярлық бөлімдерінде ел шебіне қажет мамандық түрлерін меңгерген сарбаздар алыстағы шекара бөлімшелеріне аттанды. Оларды шекарашылармен бірге жергілікті әкімдіктің өкілдері де күтіп алды.
Райымбек ауданы бойынша шекара басқармасының «Нарынқол», «Қостөбе», «Текес», «Сүмбе», «Сұңқар» және «Жазық» шекара бөлімшелері осы сәттен бастап, сарбаздардың екінші үйіне айналмақ. Мұнда оларды бірнеше аптаға созылатын «Қызметке тарту» дәрісі күтіп тұр. Шекара нарядтарына шығуды үйренген соң сарбаздарға ел шебін күзету секілді маңызды міндет сеніп тапсырылатын болады.
Тағы бір айта кетерлігі, сарбаздармен тек шекара басқармасының офицерлері жұмыс істемейді, бұл іске шекарашы ардагерлердің «Застава тарландары» республикалық қоғамдық бірлестігінің Алматы облыстық филиалының мүшелері, ҰҚК Әскери полиция өкілдері тартылған. Құзырлы мекеменің қызметкерлері «Сарбазды ұрдың – түрмеге отырдың» тақырыбында алдын алу шарасын өткізсе, саналы ғұмырын шекара ісіне арнаған ардагерлеріміз жастарға өз ақыл-кеңесін айтты.
– Бүгін бізге 70-ке тарта сарбаз келді. 30-ға жуығы «Қостөбе» шекара бөлімшесінде қызмет атқаратын болады. Қалғандары өздерінің азаматтық борышын шекара басқармасының негізгі күші шоғырландырылған «Нарынқол» шекара бөлімшесінде өтейді. Оларды Райымбек ауданы әкімінің орынбасарлары Жанарбек Жақсылық пен Ғалым Жусанбаев қарсы алып, Нарынқол өңірінің халқы атынан ізгі тілектерін арнады, – деді «Нарынқол» шекара бөлімі бастығының орынбасары, штаб бастығы, майор Руслан Қыдырмолдаұлы.
Рәсімнен кейін шекара бөлімшесінің асханасында сарбаздарға арнап мерекелік дастарқан жайылды.
Иә, шекараның күретамырына қан жүгіріп, жас сарбаздармен толықты. Мұнда олар үйренетін нәрсе көп. Ең бастысы, осы өңірдің аяулы перзенті, поэзия мұзбалағы, ақын Мұқағали Мақатаев жырлағандай, олар Отанының шетіне қадам басты. Мұнда тыныштық. Бірақ қауіпті. Сосын да Тоныкөк бабамыз секілді «күн отырмайды, түн ұйықтамайды». Өйткені осы жерден күн шығып, осы жерден таңдары арайлап атады.
Тамара ДӘУЛЕТБАЕВА
Райымбек ауданы
